Ціханоўская: Дыктатура ў Беларусі абрынецца, а беларуска-польскія стасункі застануцца на стагоддзі

9 студзеня, Позірк. Польшча для беларусаў — не проста сусед, а краіна-сябар і стратэгічны партнер, заявіла дэмакратычны лідар Святлана Ціханоўская падчас сумеснай з прэзідэнтам краіны Анджэем Дудам каляднай сустрэчы з беларускай супольнасцю ў Варшаве 9 студзеня.

“Для соцень тысяч беларусаў Польшча стала другім домам. І калі ў Беларусі пачаўся тэрор, вы ласкава адчынілі дзверы”, — сказала яна.

У краіне аднавілі дзейнасць беларускія палітычныя партыі і СМІ, прыватныя прадпрыемствы, тэатры і школы, запушчаны праграмы рэабілітацыі для былых палітвязняў і добраахвотнікаў ва Украіне, дадала яна.

На думку Ціханоўскай, калі Польша праходзіла шлях да вольнасці і еўрапейскага выбару, “знаходзіліся людзі, якія казалі, што гэта немагчыма”: “І мы зараз праходзім гэты шлях”.

Палітык выказала упэўненасць, што “дыктатура ў Беларусі абрынецца, але тыя беларуска-польскія стасункі, якія мы будуем зараз, застануцца на дзесяцігоддзі і стагоддзі ўсім дыктатарам на злосць”.

Дуду Ціханоўская падзяквала за рашучасць і паслядоўнасць у падтрымцы дэмакратычнай Беларусі. Экс-кандыдат у прэзідэнты лічыць, што польскі лідар “стаў асабістым ворагам для многіх дыктатараў у свеце”: “І я спадзяюся, што вы гэтым ганарыцеся. Але ж я рада, з іншага боку, што беларуская справа аб’ядноўвае [польскія] партыі, аб’ядноўвае людзей”.

Ціханоўская наведвае Варшаву 8–10 студзеня.