Кіраўніцтва Украіны не думае, што УСУ павінны “зайсці ў Беларусь” — Лукашэнка
8 кастрычніка, Позірк. “Ніхто з сур’ёзных людзей, нават на ўзроўні прэзідэнта [Уладзіміра] Зяленскага, не думае пра тое”, што Узброеныя сілы Украіны (УСУ) павінны “зайсці ў Беларусь”, заявіў Аляксандр Лукашэнка 8 кастрычніка ў Маскве перад пачаткам пасяджэння Савета кіраўнікоў дзяржаў — удзельніц СНД.
Фрагмент яго каментарыя апублікаваў у сваім тэлеграм-канале карэспандэнт тэлеканала “Расія-1” Павел Зарубін.
“Хай паспрабуюць [увайсці на тэрыторыю Беларусі]. Мы іх чакаем. Але я вам павінен сказаць, што ў Беларусі, калі хтосьці, як я кажу, прабачце, і вякае, то гэта людзі, якія абсалютна не прымаюць ніякіх рашэнняў. Гэта проста вяканне звычайнае <…>. Гэта галаўны боль, вельмі сур’ёзны, які прывядзе да краху наогул у ваенных адносінах кіеўскай улады. Таму гэта проста, гэта проста вяканне тых людзей, якія ні за што не адказваюць. Яны могуць казаць што заўгодна”, — сказаў Лукашэнка.
Ён адзначыў, што ў Беларусі “ў гэтых адносінах абсалютна спакойныя”.
Лукашэнка сцвярджае, што падтрымлівае “пэўныя кантакты” з Кіевам “па каналах”, якія дапамагаюць абмену ваеннапалоннымі паміж РФ і Украінай. “Кантакты падтрымліваць на гуманітарным узроўні — гэта нармальныя кантакты. Мы тут разам працуем з расіянамі, таму што з любога боку, з любых пазіцый ўлезці ў Беларусь вось такім чынам — 1,5 тыс. кіламетраў мяжа — украінцам гэта дакладна не трэба”, — сказаў ён.
Дэпутат Вярхоўнай рады Украіны ад кіроўнай партыі “Слуга народа” Алег Дунда на 13-м “Форуме свабоднай Расеі” (праходзіў 4–5 кастрычніка ў Вільнюсе) заявіў пра неабходнасць “перанесці вайну ў Беларусь”.
“Я глыбока ўпэўнены [ў гэтым]. Зайшоўшы адносна невялікім падраздзяленнем у Беларусь, беларускае войска складзе сваю зброю. Гэта нават не ўпэўненасць, гэта веданне. Я б так сказаў. А гэта вялікі ўдар пад дых Маскве”, — сказаў ён.
15 жніўня ў інтэрв’ю тэлеканалу “Расія” Лукашэнка заявіў, што “ў выпадку агрэсіі ў дачыненні да Беларусі, Расія ўводзіць свае падраздзяленні ў Беларусь”. Мінск, паводле яго слоў, прымае “першы ўдар, а далей — падстрахоўвае Расія”.
Адказваючы на пытанне, ці гатовы ён у выпадку неабходнасці націснуць “чырвоную кнопку”, якая санкцыянуе прымяненне ядзернай зброі, Лукашэнка выказаў меркаванне, што “па перыметры Беларусі і Расіі ўжо панаціскалі “чырвоныя гэтыя кнопкі”. “Засталося толькі “самую чырвоную” націснуць. Таму ў маральных адносінах, напэўна, нам з Пуціным, прымаючы такія рашэнні, дык нават ужо неяк і нязручна пра гэта казаць”, — заявіў ён.
25 верасня на пасяджэнні Савета бяспекі РФ прэзідэнт Уладзімір Пуцін заявіў, што Масква “пакідае за сабой права ўжыць ядзерную зброю ў выпадку агрэсіі супраць Расіі і Беларусі як удзельніка Саюзнай дзяржавы”.
“З беларускім бокам, з прэзідэнтам Беларусі ўсе гэтыя пытанні ўзгодненыя. У тым ліку калі праціўнік, выкарыстоўваючы звычайную зброю, стварае крытычную пагрозу нашаму суверэнітэту”, — сказаў ён.