Італьянская амбасада будзе выбарачна правяраць мэтавае выкарыстанне выдадзеных беларусам віз

13 жніўня, Позірк. Амбасада Італіі пры паўторным звароце будзе праводзіць “выбарачны маніторынг мэтавага выкарыстання выдадзеных віз”, выдадзеных беларусам, паведаміў візавы цэнтр гэтай краіны ў Мінску.

Там нагадалі, што пры атрыманні італьянскай шэнгенскай візы “галоўнай краінай прызначэння з’яўляецца Італія (што не выключае транзіт або знаходжанне ў іншых краінах Шэнгенскай зоны)”.

Пры паўторным звароце па візу ў візавым цэнтры будуць прасіць заяўнікаў “прадставіць сведчанні ранейшых паездак у Італію”, сярод якіх могуць быць аплачаныя білеты і пражыванне ў Італіі з указаннем прозвішчаў і дат, імянныя чэкі на выдаткі ў Італіі (сума аднаго не менш за 50 еўра), выпіска з банкаўскага рахунку, якая адлюстроўвае выдаткі ў Італіі. Для заяўнікаў па запрашэнні грамадзян Італіі — сумесныя фатаграфіі.

Вышэйназваныя матэрыялы, як адзначылі ў візавым цэнтры, “не ўваходзяць у абавязковы пакет дакументаў, але могуць аказацца карыснымі для рашэння аб выдачы візы”.