Эканоміка дэманструе “прыкметы выхаду на плато”, рост па выніках года можа скласці 4–5% — BEROC
20 жніўня, Позірк. Калі нічога “істотнага” не адбудзецца, то па выніках года можна чакаць росту эканомікі Беларусі на 4–5%, заявіў на брыфінгу 20 жніўня старшы навуковы супрацоўнік даследчага цэнтра BEROC Анатоль Харытончык.
“Раней рост эканомікі прагназаваўся ў дыяпазоне 3–5% у залежнасці ад таго, як будзе складвацца сітуацыя. Я гэты прагноз захоўваю. Трэба будзе паглядзець, што будзе з выніковым ураджаем. Але, мяркуючы па ўсім, ВУП будзе [плюс] 4–5%, калі нічога экстраардынарнага не адбудзецца”, — адзначыў эксперт.
Паводле яго слоў, гадавы прырост ВУП “паскорыўся ў ліпені больш чым удвая за кошт каляндарнага і кліматычнага фактараў”. “У жніўні адбудзецца карэкцыйнае зніжэнне”, — сказаў прадстаўнік BEROC.
Эканоміка дэманструе “прыкметы выхаду на плато”, падкрэсліў Харытончык, таму “высокая верагоднасць знаходжання паблізу піка дзелавога цыклу, за якім рушыць услед фаза паслаблення эканамічнай дынамікі”.
Пры гэтым, дадаў эксперт, “карэкцыя перагрэтай эканомікі да збалансаванага стану пры адсутнасці моцных шокаў не будзе хуткай”.
“Грашова-крэдытная палітыка не стала абмежавальнай, а бюджэтныя выдаткі растуць высокімі тэмпамі. Інфляцыйны ціск застаецца павышаным, але стрымліваецца адміністрацыйнымі метадамі”, — звярнуў увагу Харытончык.
Паводле звестак Белстата, валавы ўнутраны прадукт Беларусі за студзень — ліпень 2024 года склаў 137 млрд рублёў — у супастаўных цэнах на 5,5% больш, чым за аналагічны перыяд 2023-га.
У студзені рост эканомікі склаў 2,8%, студзені — лютым — 4%, студзені — сакавіку — 4,1%, студзені — красавіку — 5,1%, студзені — траўні — 5,2%, студзені — чэрвені — 5%.
Паводле найважнейшых прагнозных (дэ-факта планавых) параметраў развіцця краіны на 2024 год, прырост ВУП павінен скласці 3,8%.
Міжнародны валютны фонд чакае рост беларускай эканомікі па выніках года на ўзроўні 2,4%, Сусветны банк — 1,2%, Еўрапейскі банк рэканструкцыі і развіцця — 2,8%, Еўразійскі фонд стабілізацыі і развіцця — 3,7%.
