З-за непагадзі парушалася энергазабеспячэнне больш за 130 населеных пунктаў

21 жніўня, Позірк. На працягу мінулых сутак з-за непагадзі парушалася энергазабеспячэнне 139 населеных пунктаў, паведамляе МНС са спасылкай на ДВА “Белэнерга”.

З іх большасць у Гродзенскай вобласці (60), далей ідуць Мінская (38), Гомельская (20), Магілёўская (10), Віцебская (8) і Брэсцкая (3).

Па стане на 6 гадзін раніцы без электразабеспячэння заставаліся 32 населеныя пункты, з іх 22 у Мінскай вобласці, дзевяць — у Гродзенскай і адзін — Гомельскай.

На тэрыторыі Гродзенскай вобласці былі падтоплены 33 тэрыторыі прыватных жылых дамоў, паведамляе тэлеграм-канал аблвыканкама.

Каля в. Кунцаўшчына ў Гродзенскім раёне атрымаў пашкоджанні мост (рака ці іншы вадацёк не пазначаны): “Парушана цэласнасць моста, праезд немагчымы”.

“Для ўстаранення наступстваў і аператыўнага рэагавання на складваюцца абстаноўку былі задзейнічаны работнікі абласнога ўпраўлення МНС і кіраўніцтва Гродзенскага аблвыканкама і райвыканкама, — гаворыцца ў рэлізе. — Падтапленне на жыццядзейнасць насельніцтва не паўплывала. Адсяленне жыхароў не патрабуецца”.

У Беларусі захоўваецца аранжавы ўзровень небяспекі з-за непагадзі. Паводле звестак Белгідрамета, на большай частцы тэрыторыі 21 жніўня чакаюцца навальніцы, шквалістыя ўзмацненні ветру прагназуюцца на Захадзе краіны. Максімальная тэмпература паветра — +34 градусы.