Аб’ём пабудаванага жылля для маючых патрэбу за чатыры гады зменшыўся амаль на 13%

23 жніўня, Позірк. Плошча ўведзенага ў эксплуатацыю жылля для маючых патрэбу ў паляпшэнні ўмоў за чатыры гады паменшылася на 12,6%, сведчыць праведзены “Позіркам” аналіз даных Нацыянальнага статыстычнага камітэта.

Паводле інфармацыі Белстата, у студзені — ліпені 2024 года для гэтай катэгорыі грамадзян увялі 636.670 квадратных метраў жылля. За аналагічны перыяд 2020-га — 728.175.

У сталіцы і ўсіх абласцях (акрамя Гродзенскай) зафіксавана негатыўная дынаміка па агульнай плошчы жылля для маючых патрэбу за чатырохгадовы перыяд:

Брэсцкая: 144.454 кв. м (за сем месяцаў 2020-га — 193.883; -25,5%);

Віцебская: 50.924 (66.866; -23,8%);

Гомельская: 115.731 (132.802; -12,9%);

Гродзенская: 104.115 (59.056; +76,3%);

Мінская: 147.850 (151.027; -2,1%);

Магілёўская: 39.125 (84.267; -53,6%);

Мінск: 34.471 (40.274; -14,4%).

Як заявіў Аляксандр Лукашэнка 19 жніўня на нарадзе з урадам, у “справаздачах аналітыкаў” адной з першых прычын адтоку кадраў з невялікіх населеных пунктаў называецца “адсутнасць магчымасці набыць уласнае жыллё ці хаця б засяліцца ў арганізаванае камфортнае і добраўпарадкаванае арэнднае жыллё”.

Нагадаўшы аб сваім даручэнні “комплексна падысці да паляпшэння заканадаўства” ў галіне жыллёвага будаўніцтва, ён канстатаваў, што “статыстыка па ўводу жылля другі год запар адмоўная”.

Паводле звестак Белстата, у 2023 годзе арганізацыі ўсіх формаў уласнасці пабудавалі 47,4 тыс. кватэр, што на 4,01% менш, чым годам раней (49,4 тыс.), і на 9,54% менш, чым у 2021-м (52,4 тыс.). У мінулым годзе ў эксплуатацыю ўведзена 4 млн 193,7 тыс. кв. м агульнай плошчы жылля (-0,79%, 4 млн 226,2 тыс.; -4, 41%; 4 млн 387,3 тыс. адпаведна).

Еўразійская эканамічная камісія паведамляла, што ў 2023 годзе Беларусь заняла 4-е месца сярод пяці членаў ЕАЭС па ўводу жылля ў эксплуатацыю.