За данаты “экстрэмісцкім” структурам асуджаны 91 чалавек — праваабаронцы

23 жніўня, Позірк. За ахвяраванні розным арганізацыям і ініцыятывам, якія атрымалі “экстрэмісцкі” статус, у Беларусі па стане на 23 жніўня 2024 года асуджана не менш за 91 чалавека, паведамляе праваабарончы цэнтр “Вясна”.

Агульны тэрмін вынесенага фігурантам пакарання — 255 гадоў пазбаўлення і абмежавання волі, адзначаюць праваабаронцы.

За данаты ў структуры, якія прызнаныя “экстрэмісцкімі фарміраваннямі”, пагражае да пяці гадоў пазбаўлення волі, канстатуюць яны. Пры гэтым не гуляе ролі, у які момант структуры атрымалі такі статус.

“Таксама ў Беларусі актыўна пераследуюць паводле арт. 290¹ КК “фінансаванне тэрарыстычнай дзейнасці” — за данаты ў розныя ініцыятывы, напрыклад у ByPol і “Кіберпартызаны”. Паводле гэтага артыкула пагражае да 12 гадоў зняволення”, — адзначае “Вясна”.

Апошнім часам фігурантаў часцей пачалі судзіць адразу за фінансаванне “экстрэмісцкай” і “тэрарыстычнай” дзейнасці. Праваабаронцам вядома не менш за дзевяць такіх выпадкаў.

З 2023 года тых, хто актыўна данаціў апошнія чатыры гады, выклікаюць у КДБ і просяць па-за працэсуальным парадкам ахвяраваць сумы ў шмат разоў большыя, пагражаючы крымінальнай справай.

“Некаторым сілавікі прапануюць “адкупіцца”: зрабіць нібыта добраахвотнае ахвяраванне ў памеры ў шмат разоў больш за суму даната. Як правіла, сродкі прапануюць перавесці на спецыяльны рахунак медыцынскай установы. Але падкрэслім, што такое ахвяраванне з’яўляецца непрацэсуальнай працэдурай і не з’яўляецца штрафам ці іншым відам пакарання. Пасля следчы можа выдаць пастанову аб спыненні крымінальнай справы. Улічваючы пануючае ў Беларусі беззаконне, нельга выключаць паўторнае ўзбуджэнне крымінальнай справы па тым жа эпізодзе”, — папярэджвае”Вясна”.

У лютым Следчы камітэт заявіў, што грамадзяне ў 2023 годзе зрабілі такіх “добраахвотных ахвяраванняў” на суму больш за 37 млн рублёў (каля 11,5 млн долараў ЗША).

У сакавіку МУС паведаміла, што ў 2023 годзе “па выніках праведзеных мерапрыемстваў” распачата 17 крымінальных спраў у дачыненні да асоб, “якія ажыццяўлялі фінансаванне арганізацый, фарміраванняў і асоб, якія маюць дачыненне да экстрэмісцкай дзейнасці”.

З пачатку да сярэдзіны сакавіка 2024 года ведамства ўстанавіла 260 асоб, якія перавялі на рахункі “экстрэмісцкіх фарміраванняў” больш за 5 тыс. долараў. УУС Мінаблвыканкама сцвярджала, што гэтыя грамадзяне пазней здзейснілі “добраахвотныя ахвяраванні” на суму звыш 356 тыс. долараў.