Лік жыхароў краін Еўропы, якія наведалі Беларусь на падставе бязвізу, за тыдзень скараціўся амаль на чвэрць

2 верасня, Позірк. З 27 жніўня па 2 верасня Беларусь у бязвізавым парадку наведала 4.127 жыхароў 38 краін Еўропы (тыднем раней — 5.424; -23,9%), сведчаць даныя Дзяржаўнага пагранічнага камітэта.

Сярод іншых у краіну накіравалася 1.358 грамадзян і неграмадзян Латвіі (2.172; -37,5%), 621 грамадзянін Польшчы (692; -10,3%), 1.527 грамадзян Літвы (1.875; -18,6%) і 621 грамадзянін з ліку жыхароў іншых еўрапейскіх дзяржаў з пашыранага пераліку (685; -9,3%).

З 19 ліпеня Беларусь наведала 3.956 замежнікаў — жыхароў 35 еўрапейскіх краін з пашыранага спісу.

Паводле даных Дзяржпагранкамітэта, правам бязвізавага ўезду ў Беларусь ад пачатку дзеяння гэтага рэжыму скарысталася 953.075 замежнікаў.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. Аляксандр Лукашэнка некалькі разоў падаўжаў яго тэрмін, апошні раз — да канца 2024 года.

19 ліпеня беларускія ўлады распаўсюдзілі бязвізавы рэжым на грамадзян яшчэ 35 краін Еўропы. Большасць з іх рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.

Згодна з апублікаванай 17 ліпеня заявай Міністэрства замежных спраў, гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Яны могуць уязджаць у Беларусь без візы праз усе наземныя і паветраныя міжнародныя пункты пропуску “па сапраўдных дакументах”, знаходзіцца на беларускай тэрыторыі “не больш за 30 сутак з дня ўезду”.