Украіна па-ранейшаму не назірае “правакацыйных дзеянняў” паблізу мяжы з боку Беларусі

3 верасня, Позірк. “Правакацыйных дзеянняў або нестандартных сітуацый”, а таксама “значных перамяшчэнняў тэхнікі або вайскоўцаў” паблізу мяжы з боку Беларусі не назіраецца, заявіў на брыфінгу 3 верасня спікер Дзяржаўнай памежнай службы Украіны Андрэй Дземчанка.

Паводле яго слоў, якія прыводзіць медыя UNN.ua, украінскія сілы абароны “цалкам кантралююць дзяржаўную мяжу з Беларуссю”.

“За тым, што адбываецца далей на тэрыторыі Беларусі, актыўна сочыць наша выведка, для таго, каб разумець наколькі пагрозлівай з’яўляецца сітуацыя і як яна мяняецца, для хуткага рэагавання ў выпадку змяненняў”, — сказаў прадстаўнік памежнай службы.

Дземчанка прызнаў, што “некаторае перамяшчэнне тэхнікі і асабовага складу беларусамі глыбока ў сваёй краіне маецца”, але “яно нязначнае”.

“Беларусь і дагэтуль увесь час трымала свае падраздзяленні па накіраванні мяжы з Украінай, але блізка да нашай мяжы яны не перамяшчаліся”, — падкрэсліў ён.

Напрыканцы чэрвеня беларускія ўлады абвінавацілі Украіну ў актывізацыі выведніцкай дзейнасці, перамяшчэнні да мяжы баявых падраздзяленняў. Мінск дэманстратыўна ўзмацніў ахову мяжы, выступіў з пагрозамі на адрас Кіева.

У сярэдзіне ліпеня Аляксандр Лукашэнка загадаў вярнуць войскі з паўднёвай мяжы ў месцы сталай дыслакацыі, паколькі вайскоўцы далі рады сітуацыі “дыпламатычнай мовай”.

Расійская прапаганда заявіла пра здраду з боку Лукашэнкі, паколькі, як сцвярджалася, ўкраінскія войскі, якія вызваліліся, былі перакінутыя з паўночнага кірунку на фронт, у тым ліку для наступальнай аперацыі ў Курскай вобласці РФ.

10 жніўня Лукашэнка абвінаваціў Украіну ў парушэнні беларускай паветранай прасторы беспілотнымі лятучымі апаратамі і загадаў вярнуць да паўднёвай мяжы адведзеныя ў ліпені войскі.

Неўзабаве пасля гэтага Дземчанка заявіў, што памежная служба не бачыць змен на мяжы.

25 жніўня МЗС Украіны выступіла з заявай, у якой заклікала ўлады Беларусі адвесці войскі ад мяжы “на адлегласць, якая перавышае далёкасць паражэння наяўных у РБ сістэм агню”. На наступны дзень беларускае знешнепалітычнае ведамства абвінаваціла Кіеў у “хітрай гульні” і заявіла, што не атрымлівала афіцыйнага звароту ад украінскага боку.