Беларускія вайскоўцы адправіліся на першыя з трох запланаваных восенню вучэнняў па лініі АДКБ

4 верасня, Позірк. Беларускі воінскі кантынгент адбыў у Кыргызстан на вучэнні ў рамках Арганізацыі дагавора аб калектыўнай бяспецы (АДКБ), паведаміла 4 верасня абароннае ведамства.

Адзначаецца, што ваеннаслужачыя возьмуць удзел у камандна-штабных вучэннях з Калектыўнымі сіламі аператыўнага рэагавання (КСАР) АДКБ “Узаемадзеянне-2024”, спецыяльных вучэннях з сіламі і сродкамі разведкі “Пошук-2024”, вучэннях з сіламі і сродкамі матэрыяльна-тэхнічнага забеспячэння войскаў (калектыўных сіл) АДКБ “Эшалон-2024”.

Манеўры пройдуць на палігоне навучальнага цэнтра “Эдэльвейс” Узброеных сіл Кыргызстана. У іх возьмуць удзел кантынгенты ад узброеных сіл, міністэрстваў унутраных спраў і МНС дзяржаў — членаў АДКБ, а таксама аператыўныя групы Сакратарыята і Аб’яднанага штаба АДКБ.

Мінабароны Беларусі паведамляе, што падчас вучэнняў будуць адпрацаваныя “задачы з укараненнем новых тактычных прыёмаў і вопыту баявых дзеянняў”. “Кіруе беларускай групоўкай на ўсіх этапах вучэнняў першы намеснік начальніка Генеральнага штаба Узброеных сіл Рэспублікі Беларусь генерал-маёр Андрэй Маціевіч”, — адзначыла ведамства.

29 жніўня начальнік Аб’яднанага штаба блока Андрэй Сердзюкоў анансаваў на брыфінгу правядзенне восенню гэтага года трох асноўных сумесных мерапрыемстваў АДКБ. У першай палове верасня ў Кыргызстане пройдуць згаданыя вучэнні з Калектыўнымі сіламі аператыўнага рэагавання АДКБ “Узаемадзеянне-2024”. На пачатку кастрычніка ў Казахстане плануецца правесці манеўры з міратворчымі сіламі блока “Непарушнае брацтва-2024”. У сярэдзіне кастрычніка ў Таджыкістане намечана правесці вучэнні “Рубеж-2024” з падраздзяленнямі Калектыўных сіл хуткага разгортвання цэнтральнаазіяцкага рэгіёну.

Спланаваныя мерапрыемствы, заявіў Сердзюкоў, “скіраваныя на абарону на калектыўнай аснове незалежнасці, тэрытарыяльнай цэласнасці і суверэнітэту дзяржаў — членаў арганізацыі”, “цалкам адпавядаюць міжнародным нормам і не накіраваны супраць іншых краін”. Назіраць за вучэннямі ў Кыргызстане, паводле яго слоў, запрошаны прадстаўнікі трэціх краін: Алжыра, Егіпта, Індыі, Ірана, Кітая, Манголіі, Пакістана, Саудаўскай Аравіі, Узбекістана, а таксама сакратарыятаў ААН і ШАС, Выканкама і Антытэрарыстычнага цэнтра.

Да трох згаданых вучэнняў плануецца прыцягнуць больш за 5 тыс. чалавек і больш за 900 адзінак узбраення, ваеннай і спецыяльнай тэхнікі.

Арганізацыя Дагавора аб калектыўнай бяспецы — ваенна-палітычны блок, мэтамі якога заяўлены “ўмацаванне міру, міжнароднай і рэгіянальнай бяспекі і стабільнасці, абарона на калектыўнай аснове незалежнасці, тэрытарыяльнай цэласнасці і суверэнітэту дзяржаў-членаў”. У яго ўваходзяць Арменія, Беларусь, Казахстан, Кыргызстан, Расія і Таджыкістан.

Улады Арменіі замарозілі ўдзел краіны ў АДКБ і загаварылі аб магчымым выхадзе з блока. Ерэван абвінаваціў арганізацыю ў бяздзейнасці падчас карабахскага канфлікту з Азербайджанам, а асобных членаў — у тым, што яны “планавалі вайну” супраць Арменіі разам з Баку. Акрамя таго, армянскі прэм’ер-міністр Нікол Пашынян заявіў, што ні ён, ні які-небудзь іншы афіцыйны прадстаўнік краіны не паедзе ў Беларусь, пакуль ва ўладзе ў Менску знаходзіцца Лукашэнка — з-за заяваў апошняга аб згаданым канфлікце на сустрэчы з прэзідэнтам Азербайджана Ільхамам Аліевым ў сярэдзіне траўня.