Забаронены да служэння ў Беларусі праваслаўны святар узяты ў клір Усяленскага патрыярхата ў ЗША

5 верасня, Позірк. Забаронены да служэння ў Беларусі былы настаяцель прыхода храма Нараджэння прасвятой маці божай аграгарадка Прыбыткі Гомельскага раёна протаіерэй Пётр Пракапцоў прыняты ў клір Усяленскага патрыярхата ў ЗША. Пра гэта паведаміла ініцыятыва “Хрысціянская візія”, спаслаўшыся на рашэнне арцыбіскупа Амерыкі Эльпідафора.

Гаворка ідзе пра Грэцкую праваслаўную арцыбіскупію Амерыкі.

Адзначаецца, што аграгарадок Прыбыткі знаходзіцца за 5 км ад аэрадрома ў Зябраўцы, які выкарыстоўваўся расійскімі войскамі для авіяўдараў па Украіне.

Паводле звестак ініцыятывы, да святара шматкроць звярталіся расійскія вайскоўцы, якія дыслакаваліся ў раёне аэрадрома, з просьбай асвячаць баявую тэхніку.

“Ён катэгарычна адмаўляўся і, каб пазбегнуць ціску, выехаў на час у паломніцтва ў Свята-Духаў манастыр у Вільнюс”, — адзначаецца ў матэрыяле.

Сцвярджаецца, што арцыбіскуп Гомельскі і Жлобінскі Стэфан (Нешчарэт) падчас гэтай паездкі “пагражаў святару пазбаўленнем сану, чым вымусіў вярнуцца ў Гомель”.

“Адразу пасля вяртання Пракапцоў быў выкліканы на размову да архірэя, і пасля гэтай гутаркі яму патэлефанавалі з гомельскага ўпраўлення КДБ, дзе правялі апытанне аб прычынах паездкі ў Літву, як рабіў візу, ці супрацоўнічае з “Хрысціянскай візіяй”. Прымусілі падпісаць дакумент, што папярэджаны аб недапушчальнасці супрацьпраўных дзеянняў, спансаванні тэрарыстычнай дзейнасці, перадачы замежным СМІ звестак, што ганяць палітычны лад і прэзідэнта РБ, заклікаў да забастовак”, — гаворыцца ў рэлізе.

Адзначаецца, што, “баючыся далейшага ціску, Пракапцоў быў вымушаны выехаць за мяжу, ён быў забаронены ў служэнні арцыбіскупам Стэфанам”.

У красавіку 2023 года стала вядома, што святары Аляксандр Кухта і Георгій Рой, якія пакінулі Беларусь з-за пераследу ўладамі ў сувязі з пазіцыяй па ўнутрыпалітычным крызісе і расійскай агрэсіі ва Украіне, прынятыя ў Канстанцінопальскую праваслаўную царкву. У Вільнюсе яны заснавалі беларускі прыход Усяленскага патрыярхата. Епіскапат Беларускага экзархата Рускай праваслаўнай царквы абвясціў, што ім забаронена служыць, паколькі яны “самавольна пакінулі” свае прыходы і выйшлі з-пад юрысдыкцыі Маскоўскага патрыярхата без адпускных грамат.

Напярэдадні ў будынку, у якім знаходзіцца прыход у літоўскай сталіцы, невядомыя абстралялі вокны.