Зборы тэрытарыяльных войскаў Віцебскай вобласці пройдуць 10 верасня — 3 кастрычніка
Удзельнікі збораў тэрытарыяльных войскаў у Барысаве
9 верасня, Позірк. Навучальныя зборы тэрытарыяльных войскаў Віцебскай вобласці пройдуць 10 верасня — 3 кастрычніка, паведамляе прэс-служба Міністэрства абароны.
Адзначаецца, што на зборы будуць прызваныя ваеннаабавязаныя з Віцебскага і Аршанскага раёнаў.
Мерапрыемства праводзіцца для таго, каб “павысіць навыкі службовых асоб выканаўчых камітэтаў у фармаванні вайсковых часцей тэрытарыяльных войскаў, а ваеннаабавязаных — у выкананні задач па прызначэнні”.
6 верасня ў Гомельскай вобласці завяршыўся 12-дзённы другі этап комплекснай праверкі органаў упраўлення тэраабароны.
24 лютага 2022 года Расія пры падтрымцы рэжыму Аляксандра Лукашэнкі пачала поўнамаштабную вайну супраць Украіны. З таго часу Мінск практычна ўвесь час праводзіць розныя вайсковыя вучэнні, трэніроўкі, зборы.