Латушка і Коўшык абмеркавалі з уладамі Польшчы праблемы беларускіх студэнтаў
18 верасня, Позірк. Праблемы беларускіх студэнтаў і абітурыентаў, якія жадаюць атрымаць адукацыю ў Польшчы, абмеркавалі з прадстаўнікамі выканаўчай улады гэтай краіны намеснік кіраўніка Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка і прадстаўніца АПК па нацыянальным адраджэнні Аліна Коўшык.
Сустрэча прайшла ў Міністэрстве замежных спраў Польшчы, у ёй удзельнічалі чыноўнікі Міністэрства адукацыі, паведамляе прэс-служба АПК.
Адзначаецца, што па выніках перамоваў прадстаўніцтва па нацзраджэнні кабінета падрыхтуе інструкцыю для абітурыентаў аб “працэдуры паступлення і атрымання пасведчання ад упраўлення адукацыі (kuratorium oświaty) Польшчы”.
Паводле слоў Коўшык, Мінадукацыі Польшчы “падтрымлівае абавязак прадастаўлення абітурыентамі сертыфікатаў цэнтральнага тэставання, бо гэта абумоўлена польскім заканадаўствам, якое аднолькава для ўсіх”.
Прадстаўнікі АПК перадалі польскаму боку дакументы, якія дапамогуць спрасціць для беларусаў працэдуры паступлення і атрымання адукацыі ў гэтай краіне. Падкрэсліваецца, што прадстаўнікі Мінадукацыі “ўзялі іх для далейшага юрыдычнага аналізу”.
Коўшык звярнула ўвагу, што праблемы ў беларускіх студэнтаў і абітурыентаў узніклі пасля таго, як у 2023 годзе ўлады ў Мінску “ў аднабаковым парадку разарвалі дамову аб узаемным прызнанні дыпломаў з Польшчай”.
Таксама паведамляецца, што Міністэрства адукацыі будзе працаваць над спрашчэннем працэдур легалізацыі беларускіх студэнтаў у Польшчы.
АПК у сваю чаргу пачне пошук сярод прадстаўнікоў беларускіх няўрадавых арганізацый “упаўнаважаных асоб для прадстаўлення інтарэсаў беларускіх абітурыентаў і студэнтаў у Польшчы”.
У кабінеце заявілі пра гатоўнасць пракансультаваць абітурыентаў і студэнтаў з Беларусі па ўсіх праблемных пытаннях. Звязацца з АПК можна праз чат-бот @belcabinet_bot і акаўнт у “Інстаграме”.
Коўшык заклікала звяртацца ў АПК, бо дэмсілам “важна зразумець маштаб праблемы”.
“Цяпер у Польшчы вучыцца 12.000 беларускіх студэнтаў, гэта другая па колькасці група студэнтаў-замежнікаў. І мы ўпэўненыя, што польскія ўлады зацікаўленыя ў спрашчэнні працэдур для такой колькасці людзей”, — сказал прадстаўніца кабінета.
У ліпені праблемы беларускіх студэнтаў абмяркоўвалі ў Сенаце Польшчы на сустрэчы, арганізаванай віцэ-спікерам верхняй палаты парламента Міхалам Каміньскім. З дэлегацыяй студэнтаў, якія навучаюцца ў Польшчы, правялі перамовы намесніца міністра замежных спраў Ганна Радван, дырэктар стыпендыяльнай праграмы імя Кастуся Каліноўскага Ян Маліцкі.
На сустрэчы абмяркоўваліся тэмы “вызвалення стыпендыятаў праграмы Каліноўскага ад аплат за навучанне ў польскіх універсітэтах, магчымасці для беларускіх студэнтаў выдаваць візавыя запрашэнні для сваіх сем’яў, праблемы з выдачай апастыляў для неабходных дакументаў у Беларусі”.
У канцы жніўня СМІ паведамлялі аб праблемах беларускіх абітурыентаў з падачай дакументаў у польскія ВНУ. Нягледзячы на прынятыя ў Польшчы папраўкі, якія спрашчаюць прызнанне пасведчанняў аб сярэдняй адукацыі, атрыманай у Беларусі, універсітэты гэтай краіны патрабавалі дадатковыя пацвярджаючыя дакументы і даведкі.
Адзначалася, што ў траўні 2024 года Міністэрства адукацыі Беларусі перастала прымаць ад выпускнікоў заявы на выдачу даведак, якія пацвярджаюць легальнасць атэстатаў.
25 кастрычніка 2022 года ўрад Беларусі скасаваў пагадненне з Польшчай аб узаемным прызнанні дакументаў аб адукацыі. Адпаведную пастанову падпісаў прэм’ер-міністр Раман Галоўчанка.
“Спыніць пагадненне паміж урадам Рэспублікі Беларусь і ўрадам Рэспублікі Польшча аб прызнанні эквівалентнасці ў вышэйшай адукацыі, раўназначнасці вучоных ступеняў і ступеняў у сферы мастацтва, падпісанае ў Варшаве 28 красавіка 2005 года”, — гаворыцца ў дакуменце.