Па факце замаху на забойства супрацоўнікаў міліцыі у Магілёве ўзбуджана крымінальная справа

24 верасня, Позірк. Аб узбуджэнні крымінальнай справы па факце замаху на забойства аператыўных супрацоўнікаў міліцыі паведаміў 23 верасня ў сваім тэлеграм-канале Следчы камітэт (СК).

Паводле даных ведамства, “папярэдне ўстаноўлена, што раніцай 23 верасня ў Магілёве на скрыжаванні Пушкінскага праспекта і вуліцы Астроўскага мясцовы жыхар на просьбу супрацоўнікаў ГУБАЗіК прад’явіць дакументы накінуўся на іх з нажом”.

Паведамляецца, што “аператыўнікі, якія прынялі меры для абяззбройвання і затрымання нападніка, былі параненыя”, зараз яны знаходзяцца ў бальніцы.

Паводле даных СК, “падчас надгляду ў падазраванага канфіскаваны яшчэ адзін нож і пісталет”.

“На месцы здарэння працавала следча-аператыўная група. Ход расследавання знаходзіцца на кантролі начальніка УСК па Магілёўскай вобласці Уладзіміра Шышко”, — адзначае ведамства.

МУС у сваю чаргу адзначыла, што “ў ходзе вобыску па месцы жыхарства мужчыны знойдзены патроны, халодная зброя, дапамога па вырабе выбуховых рэчываў, экстрэмісцкая літаратура, кнігі па псіхалогіі”.

У тэлеграм-канале міністэрства распаўсюджанае відэа яго допыту пасля затрымання, імя не называецца.

Удакладняецца таксама, што адзін з параненых міліцыянтаў знаходзіцца ў аддзяленні рэанімацыі.

Пра затрыманне ў Магілёве мужчыны, які параніў нажом супрацоўніка ГУБАЗіК, раней паведаміла прэс-служба Міністэрства ўнутраных спраў.

Паводле афіцыйнай інфармацыі, “аператыўнікі 11-га ўпраўлення <…> апазналі мясцовага жыхара, які мае дачыненне да экстрэмісцкай дзейнасці”. Падчас “прафілактычнай гутаркі” мужчына, заявіла ведамства, “раптоўна дастаў нож і нанёс удары міліцыянтам”. Сцвярджалася, што ў затрыманага “знойдзены яшчэ адзін нож і пісталет”.

“Супрацоўніку аказваецца неабходная медыцынская дапамога. На месца здарэння асабіста выбыў міністр унутраных спраў Іван Кубракоў”, — гаварылася ў рэлізе.

Рэсурс “МАГІЛЁЎ Live” апублікаваў відэазапіс, зроблены відавочцам інцыдэнту, з якога вынікае, што супрацоўнік ГУБАЗіК пасля ранення быў на нагах, ён быў у цывільным.

Паводле інфармацыі выдання “Наша Ніва”, затрыманы — 62-гадовы жыхар Магілёва Аляксандр Кандрычын.