Лукашэнка назваў заходнія санкцыі “фашызмам”
27 верасня, Позірк. Захад уводзіць санкцыі не супраць уладаў, а “супраць усёй краіны і ўсіх беларусаў, у тым ліку студэнтаў, іх бацькоў, блізкіх”, заявіў 27 верасня Аляксандр Лукашэнка на сустрэчы з навучэнцамі інжынерна-тэхнічных ВНУ Мінска.
“Гэта фашызм, — цытуе Лукашэнку яго прэс-служба. — Але яны ж нас вучаць дэмакратыі, яны ад нас патрабуюць гуманнасці. Гэта нават не падвойныя стандарты, а поўная дэградацыя чалавечага сумлення і годнасці”.
Паводле яго слоў, Беларусь з’яўляецца “экспартна арыентаванай краінай з адкрытай эканомікай”. “Таму, — дадаў ён, — нас душаць санкцыямі, вымушаючы <…> шукаць новыя рынкі збыту і пастаўкі камплектуючых, выпуск якіх мы яшчэ не асвоілі, і мы іх знаходзім”.
На той жа сустрэчы Лукашэнка заявіў, што Беларусь схільная да санкцый Захаду, таму што знаходзіцца на шляху да багатай рэсурсамі Расіі.
У дачыненні да Лукашэнкі, звязаных з ім асоб, прадстаўнікоў сілавых структур, шэрагу прадпрыемстваў (уключаючы ваенна-прамысловыя), банкаў і іншых суб’ектаў, дзейнічаюць санкцыі ЗША, Еўрапейскага саюза і шэрагу асобных дзяржаў.
Абмежавальныя меры былі ўведзеныя за рэпрэсіі пасля прэзідэнцкіх выбараў 2020 года, падтрымку расійскай агрэсіі ва Украіне, стварэнне міграцыйнага крызісу на мяжы Беларусі з сумежнымі краінамі ЕС ды інш.
