70-гадовы Лукашэнка ў віншаванні з Днём пажылых людзей традыцыйна аддзяліў сябе ад гэтай катэгорыі

1 кастрычніка, Позірк. 70-гадовы Аляксандр Лукашэнка ў віншаванні з Днём пажылых людзей (адзначаецца 1 кастрычніка) традыцыйна аддзяліў сябе ад гэтай катэгорыі грамадзян, куды, паводле класіфікацыі Сусветнай арганізацыі аховы здароўя, уваходзяць людзі 60 гадоў і старэйшыя.

“Многія з вас і сёння актыўныя і дзейныя: прадаўжаюць (так у арыгінале на сайце Лукашэнкі. — “Позірк”.) працаваць, удзельнічаюць у грамадска-палітычным жыцці, выхоўваюць моладзь, шчодра дзелячыся сваімі мудрасцю і вопытам”, — гаворыцца ў віншаванні.

Год таму фармулёўкі былі падобнымі: “Людзі залатога ўзросту і сёння з’яўляюцца актыўнымі грамадзянамі, прадаўжаюць, выкарыстоўваючы свае веды і вопыт, уносіць велізарны ўклад у развіццё грамадства”.

“Вы і сёння прадаўжаеце ўносіць вялікі ўклад у развіццё краіны, шчодра дзеліцеся з моладдзю ведамі і жыццёвай мудрасцю, асабістым прыкладам выхоўваеце сапраўдных працаўнікоў і патрыётаў”, — гаварылася ў віншаванні да Дня пажылых людзей у 2022 годзе.

Апошнія тры гады назвы прэс-рэлізаў пра віншаванне з гэтым святам прэс-служба Лукашэнкі называе аднолькава — “Віншаванне з Днём пажылых людзей” (гл. скрыншот). У 2021 годзе паведамленне выйшла пад менш фармальным загалоўкам “віншаванне грамадзянам старэйшага пакалення”, у 2020-м — “Віншаванне грамадзянам старэйшага пакалення, ветэранам вайны і працы”.