Уначы ў Беларусь зноў заляцеў расійскі дрон “Шахед” — УСУ
3 кастрычніка, Позірк. Мінулай ноччу Расія атакавала Украіну 105-ю баявымі дронамі іранскай маркі “Шахед”, адзін з іх паляцеў у напрамку Беларусі, паведамілі паветраныя сілы УСУ.
Як удакладніў украінскі маніторынгавы канал “еРадар”, беспілотнік ноччу паляцеў у напрамку Мазыра (Гомельская вобласць). Пра далейшы лёс БПЛА не паведамляецца.
У ліпені, жніўні і верасні рэсурсы, якія спецыялізуюцца на маніторынгу вайсковай сітуацыі, паведамлялі пра мноства выпадкаў уварвання ў паветраную прастору Беларусі беспілотнікаў, якімі Расія атакуе Украіну.
У ноч на 5 верасня некалькі дронаў было збіта над Гомелем, абломкі аднаго з іх упалі на будынак склада, ніхто не пацярпеў. Мінабароны было вымушана прызнаць факт парушэння мяжы лятальнымі аб’ектамі, але не назвала, каму яны належалі.
8 верасня Мінабароны Латвіі паведаміла, што ў Рэзэкненскім краі (не з’яўляецца памежным, размешчаны прыкладна за 35 км ад мяжы з Беларуссю) разбіўся расійскі дрон. На наступны дзень кіраўніцтва Нацыянальных узброеных сіл Латвіі заявіла, што пацярпелы крушэнне ў Гайгалаўскай воласці Рэзекненскага краю дрон быў “начыненым выбухоўкай беспілотнікам тыпу Shahed”.
17 верасня Аляксандр Лукашэнка заявіў, што ўлады “дамовіліся па каналах з украінцамі”, што бакі не будуць “у СМІ падсвятляць факты залёту беспілотнікаў і расійскіх, і ўкраінскіх” на беларускую тэрыторыю.
Ён прызнаў, што баявыя беспілотнікі час ад часу залятаюць на тэрыторыю Беларусі, адзін з іх нібыта быў знойдзены “аж пад Бабруйскам”. “Гэта былі ўкраінскія беспілотнікі, а не расійскія. Хоць і з іншага боку бывае”, — адзначыў Лукашэнка.
