Беларуса затрымалі ў Польшчы за захоўванне незаконнага агнястрэла і цыгарэт без акцызу

4 кастрычніка, Позірк. Грамадзянін Беларусі затрыманы ў Польшчы па падазрэнні ў “захоўванні незаконнай агнястрэльнай зброі і кантрабандных цыгарэт без акцызных марак”. Пра гэта паведамляе паліцыя польскага горада Отвацк (Мазавецкае ваяводства, прыгарад Варшавы).

Пры ператрусе месца пражывання 35-гадовага грамадзяніна Беларусі ў яго знойдзена агнястрэльная зброя “ў выглядзе кулямёта ППС калібра 7,62 і цыгарэты без неабходных акцызных марак”.

“Раённая пракуратура ў Атвоцку пачала расследаванне па дадзенай справе. Мужчыну пагражае да васьмі гадоў пазбаўлення волі. Суд вырашыў, што мужчыне трэба забараніць выезд з краіны, канфіскаваць пашпарт і ўсталяваць нагляд паліцыі”, — гаворыцца ў рэлізе.

У лютым польскія памежнікі заявілі, што кантрабанда беларускіх цыгарэт у Польшчу ў 2023 годзе павялічылася ў 12 разоў. Беларускія цыгарэты польскія памежнікі выяўляюць у чыгуначным і грузавым аўтамабільным транспарце, у “грузах драўніны, вугалю, солі, у ахоўных пакрыццях вагонаў-цыстэрнаў”.

У апошні час кантрабандысты выкарыстоўваюць новы спосаб перапраўкі цыгарэт з Беларусі — з дапамогай метэаралагічных зондаў. 30 верасня, пасля чарговага такога выпадку, Служба аховы дзяржаўнай мяжы Літвы (САДМ) заявіла, што ініцыюе папраўкі ў заканадаўства, каб атрымаць права прымяняць агнястрэльную зброю супраць невядомых аб’ектаў, якія залятаюць на тэрыторыю краіны па паветры.