11 кастрычніка, Позірк. “Досвед і кампетэнтнасць Нілса Муйжніекса працягнуць важную справу па паляпшэнні сітуацыі з правамі чалавека ў Беларусі”, — такім чынам Офіс Святланы Ціханоўскай пракаментаваў абранне прадстаўніка Латвіі на пасаду профільнага спецыяльнага дакладчыка ААН.
Беларуская дэмакратычная структура падзякавала Муйжніексу “за гатоўнасць узяць на сябе гэтую складаную, але вельмі значную задачу”.
Мандат спецдакладчыка, падкрэсліў Офіс Ціханоўскай, “робіць важны ўнёсак у справу абароны правоў беларусаў, якія пацярпелі ад палітычных рэпрэсій і дзяржаўнага тэрору ў Беларусі”.
Прадстаўніцтва дэмлідара таксама падзякавала Анаіс Марэн, што пакуль яшчэ займае пасаду спецдакладчыка, за “незалежную, адданую і самаадданую працу”, якая “прывяла да таго, што сусветная грамадскасць даведалася пра сістэмныя парушэнні, якія адбываюцца ў Беларусі кожны дзень”.
“Яе праца па абароне правоў беларусаў стала значным унёскам у барацьбу за аднаўленне справядлівасці ў нашай краіне”, — адзначыў Офіс Ціханоўскай.
Пра тое, што Нілс Раймандс Муйжніекс абраны новым спецдакладчыкам па правах чалавека ў Беларусі, было абвешчана 11 кастрычніка на 57-й сесіі СПЧ ААН.
Муйжніекс нарадзіўся 31 студзеня 1964 года ў Лос-Анджэлесе (ЗША) у сям’і латышскіх эмігрантаў. Размаўляе на англійскай, латышскай, французскай і рускай мовах.
У 2012–2018 гадах Муйжніекс быў камісарам Савета Еўропы па правах чалавека. У 2020-2024 гадах займаў пасаду дырэктара Еўрапейскага рэгіянальнага офіса міжнароднай праваабарончай арганізацыі Amnesty International.
Мандат спецдакладчыка па правах чалавека ў Беларусі заснаваны ў 2012 годзе і з таго часу штогод падаўжаецца (апошні раз — сёлета ў красавіку).
З лістапада 2018 года пасаду займае францужанка Анаіс Марэн, яна пакіне яе 1 лістапада 2024-га. Яе апошні на пасадзе даклад “Становішча ў галіне правоў чалавека ў Беларусі” будзе разгледжаны на 79-й сесіі Генеральнай асамблеі ААН у Нью-Ёрку ў кастрычніку.
Аўтарызавацца
Забыліся пароль?
Выхад з профілю
