Супраць кіраўніка сельгаспрадпрыемства ў Віцебскай вобласці ўзбуджаная крымінальная справа за хабар

11 сакавіка, Позірк. Супраць кіраўніка аднаго з сельгаспрадпрыемстваў Віцебскай вобласці распачатая крымінальная справа паводле арт. 430 КК (атрыманне хабару), паведамляе Міністэрства ўнутраных спраў.

Згодна з матэрыяламі справы, 38-гадовы дырэктар арганізацыі прыняў незаконнае грашовае ўзнагароджанне ў памеры 15 тыс. рублёў за вырашэнне пытання аб заключэнні дагавораў арэнды будаўнічай, сельскагаспадарчай тэхнікі, а таксама аб своечасовай аплаце за іх выкарыстанне.

Фігуранту пагражае да 10 гадоў пазбаўлення волі, адзначае МУС.

Пра тое, што найбольш схільнай да карупцыйных з’яў у Беларусі з’яўляецца сфера сельскай гаспадаркі, у якой здзяйсняецца прыкладна кожнае пятае адпаведнае злачынства, заявіў у інтэрв’ю “Першаму інфармацыйнаму” тэлеканалу ў снежні мінулага года старшы пракурор па асаблівых даручэннях упраўлення па барацьбе з карупцыяй і арганізаванай злачыннасцю Генеральнай пракуратуры Арцём Ігнаценка.

Паводле даных Вярхоўнага суда, у 2025 годзе за здзяйсненне злачынстваў карупцыйнай накіраванасці асуджана 657 асоб — на 7,3% менш, чым у 2024-м (709). З асуджаных 199 чалавек прыгавораныя да розных тэрмінаў пазбаўлення волі. Пазбаўленне права займаць пэўную пасаду або займацца пэўнай дзейнасцю ў якасці асноўнай меры пакарання прызначана 17 асобам, у якасці дадатковай — 557.

Аляксандр Лукашэнка прыйшоў да ўлады ў сярэдзіне 1990-х гадоў шмат у чым дзякуючы вобразу змагара з карупцыяй і працягвае выкарыстоўваць гэтую тэму. За 30 гадоў карупцыя так і не была пераможаная.