РФ эвакуявала 81 грамадзяніна Беларусі, які працаваў на АЭС у Іране

15 красавіка, Позірк. Расія эвакуявала 81 грамадзяніна Беларусі, які працаваў на Бушэрскай атамнай электрастанцыі ў Іране, вынікае з заявы генеральнага консула РФ у Ісфахане Андрэя Жыльцова агенцтву “РИА Новости”.

Гаворка, імаверна, пра беларусаў — супрацоўнікаў расійскіх падрадных арганізацый, паколькі Бушэрская АЭС збудаваная, абслугоўваецца і падтрымліваецца дзяржкарпарацыяй “Расатам”.

Жыхароў паведаміў, што акрамя беларускіх грамадзян, са станцыі эвакуяваныя грамадзяне Таджыкістана (27), Арменіі (4), Узбекістана (3), Казахстана і Украіны (па 1).

Вывезеныя члены сем’яў супрацоўнікаў амбасады, генконсульства РФ у Ісфахане і шэрагу іншых акрэдытаваных у Іране расійскіх арганізацый. Агулам з гэтай краіны Расія эвакуявала 632 чалавекі — сваіх і замежных грамадзян.

Паводле інфармацыі РБК, эвакуацыя спецыялістаў з Бушэрскай АЭС пачалася пасля эскалацыі канфлікту на Блізкім Усходзе. Раён размяшчэння АЭС быў тройчы атакаваны ў сакавіку, адзін раз — у красавіку. У апошні раз, паводле звестак Арганізацыі па атамнай энергіі Ірана, снарад трапіў у агароджу АЭС, загінуў адзін чалавек.

28 лютага Ізраіль і ЗША пасля правалу перамоваў па ядзернай праграме Тэгерана пачалі ваенныя аперацыі супраць рэжыму аятолаў у Іране. У выніку быў забіты вярхоўны лідар Ірана Алі Хаменеі, а таксама іншыя прадстаўнікі палітычнага і вайсковага кіраўніцтва Ірана.

Тэгеран наносіць удары ў адказ. Іранскія атакі зазнае не толькі Ізраіль, але і (апошнім часам — з меншай інтэнсіўнасцю) іншыя краіны Блізкага Усходу. Да абстрэлаў актыўна далучылася ліванская групоўка “Хізбалла”, у адказ Ізраіль праводзіць ваенныя аперацыі і на тэрыторыі Лівана, падчас якіх ужо загінула 10 вайскоўцаў Арміі абароны Ізраілю.

У выніку адной з іранскіх ракетных атак у Ізраілі загінуў ураджэнец Беларусі, які пражываў там, агулам прамымі і ўскоснымі ахвярамі такіх дзеянняў стала 25 чалавек, таксама ў выніку абстрэлаў загінула чатыры жыхары Палестынскай аўтаноміі.

Колькасць ахвяр у Іране дакладна невядомая. Іранскі Чырвоны Паўмесяц паведамляў пра гібель каля 2.000 чалавек і раненні звыш 20.000. Ізраільскія крыніцы заяўляюць пра 7.000 загінулых толькі ў шэрагах сілавых структур Ірана.

Армія ЗША паведаміла пра 13 загінулых амерыканскіх вайскоўцаў у выніку атак з Ірана і крушэння самалёта KC-135 у Іраку.