Лукашэнка: У нас утрыманства вельмі моцна развітае

14 красавіка, Позірк. Сістэмы, калі спачатку ствараліся ўмовы для грамадзян, а потым была эканоміка, больш не будзе, заявіў Аляксандр Лукашэнка 14 красавіка на нарадзе па пытаннях комплекснага сацыяльна-эканамічнага развіцця паўднёва-ўсходняга рэгіёна Магілёўскай вобласці.

“Мы ўжо так распесцілі сваіх людзей,-цытуе прамоўцу яго прэс-служба. — Будзе эканоміка — будуць і грамадзяне жыць нармальна. Таму наперадзе эканоміка, вытворчасці. А ў нас утрыманства вельмі моцна развітае“.

Лукашэнка падкрэсліў, што ўсю працу па развіцці паўднёвага ўсходу Магілёўскай вобласці не павінен цягнуць толькі аблвыканкам, патрэбныя памочнікі і адказныя на ўзроўні краіны.

“Абласны камітэт павінен даручыць гэта старшыням райвыканкамаў, і яны павінны варушыцца на месцы і адказваць за канкрэтныя планы“, — сказаў ён.

На думку прамоўцы, “нам трэба мабілізоўвацца цяпер, каб перажыць гэты складаны час”. “Я як прэзідэнт не ведаю, да чаго вас рыхтаваць. Вось працуем, каб жыць. Адзін лозунг: “Працуем, каб жыць”. Не проста выжыць, а каб жыць. А што далей? А далей ніхто не ведае, што адбудзецца, што там выкінуць моцныя гэтага свету“, — мяркуе Лукашэнка.

“Трэба, каб людзі разумелі, як будзем дзейнічаць далей… Трэба стварыць краіну, якую мы перададзім новым пакаленням“, — заявіў ён.

Як адзначыў на нарадзе старшыня Камітэта дзяржаўнага кантролю Васіль Герасімаў, праграма падтрымкі паўднёвага ўсходу вобласці на папярэднія гады “не спрацавала так, як павінна была“.

У прыватнасці, скарацілася насельніцтва і колькасць занятых у эканоміцы. Не дасягнутыя паказчыкі па аб’ёмах вытворчасці ў сельскай гаспадарцы, назіраецца падзеж жывёлы. Дзяржпадтрымка ў шэрагу выпадкаў вышэйшая, чым выручка сельгаспрадпрыемстваў, якім яна даецца. Ёсць недахопы ў напаўняльнасці сучасных комплексаў, якія будуюцца ў рэгіёне, высокапрадуктыўным пагалоўем жывёлы.

У ліку праблем, выяўленых КДК, — безгаспадарчае стаўленне да сельгастэхнікі, яе неналежнае захоўванне і рамонт, адсутнасць механізатараў, замацаваных за дарагімі сучаснымі трактарамі і камбайнамі.

“Няхай старшыні райвыканкамаў у струнку выцягваюцца і тых людзей, якія ёсць, хай прымушаюць працаваць. Не трэба нікога ўгаворваць”, — запатрабаваў Лукашэнка.