МЗС уручыў армянскаму дыпламату ноту пратэсту пасля візіту Ціханоўскай у Ерэван
5 траўня, Позірк. Часовы павераны ў справах Арменіі Артур Саргсян выкліканы 5 траўня ў Міністэрства замежных спраў Беларусі, паведаміла прэс-служба знешнепалітычнага ведамства.
Дыпламату “заяўлены рашучы пратэст і ўручана адпаведная нота ў сувязі з нядаўнімі недружалюбнымі дзеяннямі армянскага боку”, гаворыцца ў кароткім паведамленні.
4 траўня ў Арменію прыбыла дэмакратычны лідар Святлана Ціханоўская, гэта яе першы візіт у краіну. У Ерэване палітык удзельнічала ў саміце Еўрапейскай палітычнай супольнасці (ЕПС), правяла сустрэчы з сусветнымі лідарамі і армянскім прэм’ер-міністрам Ніколам Пашынянам.
Спікер Нацыянальнага сходу Арменіі Ален Сіманян у інтэрв’ю Грамадскаму тэлебачанню Арменіі 1 траўня заявіў пра спробу расійскага ўмяшання ў маючыя адбыцца ў краіне парламенцкія выбары. У гэтым кантэксце ён адзначыў, што ўлады ў Ерэване не дазволяць “ператварыць Арменію ў губерню”. “Мы не будзем кіравацца так, як кіруецца Беларусь”, — сказаў Сіманян.
4 траўня прэс-сакратар Міністэрства замежных спраў Руслан Варанкоў заявіў, што гэтая заява “не што іншае, як перадвыбарчы папулізм і адчайная спроба адцягнуць уласны электарат ад найцяжэйшых унутраных праблем”.
“Беларусь — суверэнная дзяржава, якая самастойна вызначае фармат сваіх саюзніцкіх адносін з Расіяй. Мы ганарымся гэтым супрацоўніцтвам і нікому не дазволім нас павучаць. Спробы ўцягнуць Мінск ва ўнутрыпалітычныя сваркі пад лозунгамі міфічнага ўмяшання — грубае парушэнне элементарнай дыпламатычнай этыкі”, — сказаў спікер МЗС.
“Вынікі ж так званага збалансаванага празаходняга курсу афіцыйнага Ерэвана наглядныя: дэпапуляцыя, хранічная эканамічная нестабільнасць і поўная замежнапалітычная залежнасць, якая змушае марыянеткава абслугоўваць чужыя саміты”, — адзначыў Варанкоў, відавочна, маючы на ўвазе згаданы саміт Еўрапейскай палітычнай супольнасці.
Арменія пад кіраўніцтвам Пашыняна, які прыйшоў да ўлады ў 2018 годзе пасля пратэстаў супраць ранейшых кіраўнікоў краіны, узяла курс на збліжэнне з Еўрасаюзам.
Пры гэтым у апошнія гады адносіны паміж Мінскам і Ерэванам значна пагоршыліся. Прычынай таму стаў апошні карабахскі ваенны канфлікт з Азербайджанам (першая фаза — канец 2020-га, другая — канец 2023-га), у выніку якога непрызнаная Нагорна-Карабахская Рэспубліка, якую падтрымлівала Арменія, спыніла існаванне, а тэрыторыі перайшлі пад кантроль Баку.
Ерэван, які стаяў ля вытокаў стварэння Арганізацыі Дагавора аб калектыўнай бяспецы, папракнуў ваенна-палітычны блок у бяздзейнасці ў гэтай сітуацыі. Больш за тое, паводле сцвярджэння Пашыняна, некалькі краін АДКБ фактычна дапамагалі Баку. Не назваўшы гэтыя дзяржавы наўпрост, армянскі прэм’ер недвухсэнсоўна намякнуў, што адна з іх — Беларусь.
