17 кастрычніка, Позірк. За верасень з палітычных матываў асуджана мінімум 170 чалавек (жанчыны — 46, мужчыны — 124), паведамляе праваабарончы цэнтр “Вясна”.
У Мінску асудзілі 61 чалавека, у Брэсцкай вобласці — 44, Мінскай — 25, Гомельскай — 20, Віцебскай — 9, Магілёўскай — 8, Гродзенскай — 3.
У 46% асуджаных у абвінавачанні быў арт. 342 КК (арганізацыя і падрыхтоўка дзеянняў, якія груба парушаюць грамадскі парадак). Паводле інфармацыі праваабаронцаў, працягвалася практыка пераследу цэлых сем’яў ці груп сваякоў паводле гэтага артыкула.
У мінулым месяцы працягвалася тэндэнцыя “паўторнага і наступнага асуджэння грамадзян, раней рэпрэсаваных з палітычных матываў”, адзначае “Вясна”. Паўторна асудзілі 12 чалавек.
Толькі за верасень зафіксавана восем выпадкаў пераследу раней рэпрэсаваных грамадзян паводле арт. 411 КК (злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі).
Масавыя рэпрэсіі ў Беларусі не спыняюцца з 2020 года. На 17 кастрычніка ў Беларусі прызнаныя палітычнымі зняволенымі 1.289 чалавек. Колькасць асуджаных з палітычных матываў значна большая.
