Аранжавы ўзровень небяспекі абвешчаны на 6 красавіка ва ўсіх абласцях, акрамя Магілёўскай

5 красавіка, Позірк. Ва ўсіх абласцях, акрамя Магілёўскай, на 6 красавіка абвешчаны аранжавы ўзровень небяспекі з-за неспрыяльных з’яў надвор’я, вынікае з інфармацыі Міністэрства па надзвычайных сітуацыях.

Чакаецца тэмпература 7–13 градусаў з моцным ветрам (15–20 м/с) на большай частцы тэрыторыі краіны.

МНС не выключае падзення дрэў, парушэння энергазабеспячэння, абвальвання канструкцый, пашкоджання ліній сувязі і электраперадач.

Ведамства рэкамендуе грамадзянам прыбраць “гаспадарчыя рэчы з двара і балконаў”, пераставіць аўтамабілі ў гараж або месцы “ўдалечыні ад дрэў”, абыходзіць на вуліцы “хісткія будынкі і дамы з няўстойлівым дахам”, пазбягаць “дрэў і разнастайных збудаванняў падвышанай рызыкі (мастоў, экстакад, трубаправодаў, ліній электраперадач, патэнцыйна небяспечных прамысловых аб’ектаў)”.

Таксама рэкамендуецца не наведваць атракцыёны.

Аранжавы ўзровень небяспекі з-за неспрыяльнага надвор’я аб’яўляўся па ўсёй Беларусі 13–15 лютага.