Ціханоўская падчас двухдзённага візіту ў Варшаву возьме ўдзел у адкрыцці Кубка Івуліна

17 кастрычніка, Позірк. Дэмакратычны лідар Святлана Ціханоўская і міністр спорту і турызму Польшчы Славамір Нітрас 19 кастрычніка ў Варшаве возьмуць удзел у цырымоніі адкрыцця футбольнага турніру Кубак Івуліна-2024.

Пра гэта “Позірку” паведаміла прэс-служба дэмлідара.

Візіт Ціханоўскай у Варшаву пройдзе 18–19 кастрычніка.

Падчас візіту палітык возьме ўдзел у Еўрапейскім форуме новых ідэй (EFNI), які пазіцыянуецца арганізатарамі як адна з найбуйнейшых рэгіянальных пляцовак, на якой абмяркоўваюцца “сусветныя тэндэнцыі, новыя ідэі і будучыня кантынента”.

Сёлета спікерамі мерапрыемства ад Польшчы заяўленыя прэм’ер-міністр Дональд Туск, міністр юстыцыі Адам Боднар, міністр фінансаў Анджэй Даманьскі, міністр сям’і, працы і сацыяльнай палітыкі Агнешка Дземяновіч-Бонк, міністр дзяржаўных актываў Якуб Явароўскі і інш.

Чакаецца, што ў Варшаве Ціханоўская правядзе сустрэчу з дэпутатамі Еўрапарламента Міхаілам Кабоска і Магдаленай Адамовіч.

Кубак Івуліна — аматарскі футбольны турнір, у якім удзельнічаюць беларускія эмігранты. Праводзіцца штогод з 2022 года. Названы імем спартыўнага журналіста і блогера, былога палітвязня Аляксандра Івуліна. У першым турніры прымала ўдзел 16 каманд, у другім — 32, цяпер заяўлены 24.

Івулін быў затрыманы ў Мінску 3 чэрвеня 2021 года. Пасля 30 сутак адміністрацыйнага арышту яго абвінавацілі паводле ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). 19 студзеня 2022 года журналіста прыгаварылі да двух гадоў пазбаўлення волі. Тэрмін адбываў у калоніі № 22 (“Воўчыя норы”) у Даманава Івацэвіцкага раёна (Брэсцкая вобласць). Пасля выхаду на волю пакінуў Беларусь.