Беларусь зацікаўленая ў далейшым навучанні студэнтаў са Шры-Ланкі ў медыцынскіх ВНУ
23 кастрычніка, Позірк. Міністр замежных спраў Максім Рыжанкоў абмеркаваў 23 кастрычніка з першым намеснікам кіраўніка МЗС Шры-Ланкі Аруні Ясодха Віджэварданэ “пытанні развіцця двухбаковых адносін у палітычнай, гандлёва-эканамічнай, гуманітарнай сферах”, паведамляе прэс-служба беларускага знешнепалітычнага ведамства.
Сустрэча прайшла на палях XVI саміту БРІКС у Казані (Расія).
Паведамляецца, што бакі “пацвердзілі ўзаемную зацікаўленасць у аднаўленні практыкі правядзення кансультацый паміж МЗС, а таксама работы сумеснай Беларуска-Ланкійскай камісіі па гандлёвым і эканамічным супрацоўніцтве, адзначана важнасць павелічэння і дыверсіфікацыі ўзаемнага збалансаванага тавараабароту”.
“У кантэксце развіцця гуманітарнага ўзаемадзеяння падкрэсленая значнасць навучання ў Беларусі студэнтаў са Шры-Ланкі, перш за ўсё, у медыцынскіх ВНУ”, — гаворыцца ў рэлізе.
Акрамя гэтага, удзельнікі перамоў “выказалі зацікаўленасць у развіцці турызму, што паслужыць умацаванню кантактаў паміж народамі дзвюх краін”.
Паводле звестак праўладнай Федэрацыі прафсаюзаў Беларусі, у ВНУ краіны ў 2024 годзе праходзяць навучанне грамадзяне не менш за 110 краін свету, у тым ліку са Шры-Ланкі. Цэны за навучанне складаюць ад 3.000 да 5.000 долараў у год у залежнасці ад спецыяльнасці.
Дыпламатычныя адносіны паміж Беларуссю і Дэмакратычнай Сацыялістычнай Рэспублікай Шры-Ланка ўстаноўленыя 20 лістапада 2000 года.
Паводле даных на сайце амбасады Беларусі ў Індыі, у 2021 годзе тавараабарот са Шры-Ланкой вырас да 39,6 млн долараў (+23,7%), беларускі экспарт павялічыўся да 31 млн (+27,2%), імпарт — да 8,5 млн долараў (+13%). Асноўная экспартная прадукцыя ў Шры-Ланку — калійныя ўгнаенні.
Актуальных даных аб узаемным гандлі на сайце амбасады не прадстаўлена.
Саміт БРІКС пачаўся ў Казані 22 кастрычніка.
23 кастрычніка ў Казань прыбыў Аляксандр Лукашэнка. Яго прэс-служба паведамляе аб праведзеных сустрэчах з прэзідэнтам Венесуэлы Нікаласам Мадурам, прэзідэнтам Лаоса Тханглунам Сісулітам, а таксама прэм’ер-міністрам Эфіопіі Абіем Ахмедам Алі.
Таксама ў Казані Лукашэнка даў інтэрв’ю журналістцы тэлеканала “Расія 1” Вользе Скабеевай, падчас якога заявіў пра намер балатавацца на чарговы прэзідэнцкі тэрмін у 2025 годзе.
