У Мінск зноў прыедзе кіраўнік МЗС Венгрыі Сіярта
28 кастрычніка, Позірк. Каля 600 удзельнікаў збярэ II Мінская міжнародная канферэнцыя па еўразійскай бяспецы, чакаецца прыбыццё кіраўнікоў МЗС Венгрыі і Расіі Петэра Сіярта і Сяргея Лаўрова, паведаміў прэс-сакратар беларускага знешнепалітычнага ведамства Анатоль Глаз.
Як паведамлялася, канферэнцыя пройдзе 31 кастрычніка — 1 лістапада.
Паводле слоў Глаза, удзельнічаць у мерапрыемствах форуму будуць прадстаўнікі краін АБСЕ, СНД, ШАС, “кіраўнікі шэрагу міжнародных арганізацый і высокапастаўленыя эксперты вядучых “фабрык думкі” ўсяго еўразійскага рэгіёну”.
Усяго ў Мінску чакаюць прадстаўнікоў 45 краін. Паводле сцвярджэння Глаза, на канферэнцыю акрэдытаваныя 150 журналістаў беларускіх і замежных СМІ.
У першы дзень форуму запланаваны выступ “14 высокапастаўленых гасцей, у тым ліку кіраўнікоў МЗС Венгрыі, Расіі, Сірыі, генеральнага сакратара АДКБ, генеральнага сакратара СНД, дзяржсакратара Саюзнай дзяржавы”, сказаў прадстаўнік МЗС Беларусі.
I канферэнцыя па еўразійскай бяспецы прайшла ў Мінску 26–27 кастрычніка 2023 года. Сіярта таксама на ёй прысутнічаў. Быў заяўлены ўдзел “кіраўнікоў шэрагу міжнародных арганізацый, прадстаўнікоў акадэмічнай і экспертнай супольнасцяў парадку 30 краін”.
Урад Беларусі ўключыў Венгрыю ў спіс “недружалюбных” краін. Пры гэтым Венгрыя застаецца адзінай краінай Еўрасаюза, якая падтрымлівае публічныя кантакты з Мінскам. Як член ЕС яна далучылася да санкцый супраць рэжыму Лукашэнкі, аднак прадстаўнікі венгерскіх уладаў неаднаразова заяўлялі, што не падтрымліваюць іх.
29 траўня Сіярта наведваў Мінск з рабочым візітам.
“Сорамна бачыць”, як міністр замежных спраў Венгрыі прыязджае ў Беларусь, паколькі гэтыя візіты “становяцца рэгулярнымі”, напісаў на наступны дзень галоўны дарадца дэмакратычнага лідара Беларусі Святланы Ціханоўскай Франак Вячорка.
“Такія сустрэчы ўносяць раскол у адзінства ЕС у яго палітыцы ізаляцыі рэжыму Лукашэнкі, узаконьваючы рэпрэсіі і тэрор супраць беларусаў. Некалькі крывадушна”, — адзначыў ён.
9 верасня паведамлялася аб акрэдытацыі аташэ па пытаннях абароны, ваеннага і ваенна-паветранага аташэ пры амбасадзе Венгрыі ў Беларусі палкоўніка Іштвана Багнара.
20 жніўня, віншуючы прэм’ер-міністра Венгрыі Віктара Орбана з нацыянальным святам — Днём святога Іштвана, Аляксандр Лукашэнка назваў гэтую дзяржаву краінай з “адказнай і актыўнай пазіцыяй, якая паслядоўна праводзіць узважаную міралюбную палітыку”.
Лукашэнка падкрэсліў, што, “нягледзячы на любыя міжнародныя складанасці”, Мінск і Будапешт застаюцца “вернымі сваім прынцыпам, развіваюць узаемавыгаднае раўнапраўнае супрацоўніцтва, заснаванае на павазе і падабенстве поглядаў па многіх пытаннях”.