За пяць дзён у рамках аперацыі АДКБ у Беларусі канфіскавана больш за 2,5 кг наркотыкаў і псіхатропаў — МУС

30 кастрычніка, Позірк. У Беларусі ў рамках антынаркатычнай аперацыі “Канал — Авангард” з незаконнага абароту выключана больш за 2,5 кг наркотыкаў і псіхатропаў, паведаміў намеснік начальніка Галоўнага ўпраўлення па наркакантролі і супрацьдзеянні гандлю людзьмі МУС Андрэй Кудрыцкі.

Мерапрыемствы прайшлі з 21 па 25 кастрычніка на тэрыторыі дзяржаў — членаў Арганізацыі Дагавора аб калектыўнай бяспецы.

“Выяўлены 72 злачынствы, звязаныя з незаконным абаротам наркотыкаў, — цытуе яго прэс-служба МУС. — Да крымінальнай адказнасці прыцягнутыя 59 чалавек. Перакрыты канал пастаўкі наркотыкаў з тэрыторыі Расіі. Выяўлены два памяшканні, прыстасаваныя для вырошчвання раслін з утрыманнем наркотыкаў”.

Таксама з незаконнага абароту было канфіскавана чатыры адзінкі агнястрэльнай зброі і 248 боепрыпасаў.

Паводле Кудрыцкага, у Беларусі быў рэалізаваны комплекс мерапрыемстваў на дарогах у беларуска-расійскім прыграніччы, у нацыянальным аэрапорце Мінск, на аб’ектах паштовай сувязі і прадпрыемствы экспрэс-даставак.

“У пунктах пропуску і мытнага афармлення на знешняй мяжы ЕАЭС узмоцнена дзейнасць па выяўленні злачынстваў у сферы незаконнага абароту наркотыкаў з выкарыстаннем ІТ-тэхналогій. Штосутачна ў сярэднім задзейнічаліся больш за 640 супрацоўнікаў МУС, ДМК, КДБ, ДПК”, — сказаў прадстаўнік МУС.

У 2023 годзе мытнымі органамі “было выяўлена каля 400 фактаў незаконнага перамяшчэння праз мытную мяжу наркатычных сродкаў і псіхатропных рэчываў”, паведаміў 23 верасня начальнік Галоўнага ўпраўлення па наркакантролі і супрацьдзеянні гандлю людзьмі МУС Алег Сільвестравіч.

“Былі ўзбуджаныя 275 крымінальных справаў. З незаконнага абароту было канфіскавана больш за 800 кг наркатычных сродкаў і псіхатропных рэчываў”, — сказаў ён.

Арганізацыя Дагавора аб калектыўнай бяспецы — ваенна-палітычны блок, мэтамі якога заяўлены “ўмацаванне міру, міжнароднай і рэгіянальнай бяспекі і стабільнасці, абарона на калектыўнай аснове незалежнасці, тэрытарыяльнай цэласнасці і суверэнітэту дзяржаў-членаў”.

У яго ўваходзяць Арменія, Беларусь, Казахстан, Кыргызстан, Расія і Таджыкістан.