Дададзеныя абзацы 5–7.
8 лістапада, Позірк. Дэмакратычны лідар Святлана Ціханоўская 9 лістапада возьме ўдзел у мерапрыемствах, прысвечаных 35-годдзю падзення Берлінскай сцяны.
Пра прыбыццё ў Берлін палітык паведаміла на сваёй старонцы ў сацсетцы Х.
Падзенне сцяны яна назвала “важнай вяхой у барацьбе за свабоду ў Еўропе”.
“З нецярпеннем чакаю сустрэчы з палітыкамі, актывістамі і прадстаўнікамі сродкаў масавай інфармацыі”, — адзначыла Ціханоўская.
Як паведаміў “Позірку” галоўны дарадца дэмлідара Франак Вячорка, частка мерапрыемстваў у гонар 35-годдзя падзення Берлінскай сцяны пройдзе 8 лістапада, у тым ліку з удзелам мэра сталіцы Германіі Кая Вегнера.
Асноўнае мерапрыемства запланавана на 9 лістапада каля мемарыяла Берлінскай сцяны. У ім будзе ўдзельнічаць прэзідэнт Германіі Франк-Вальтэр Штайнмаер.
Падчас візіту ў Берлін Ціханоўская дасць інтэрв’ю замежным СМІ, у тым ліку тэлеканалу Euronews.
Берлінская сцяна — назва комплексу інжынерна-тэхнічных збудаванняў і ўмацаванняў з абсталяванай забароненай зонай, збудаваных камуністычнымі ўладамі ГДР па ўказанні кіраўніцтва СССР вакол дэмакратычнага Заходняга Берліна па лініі размежавання. Існавала з 13 жніўня 1961 года па 9 лістапада 1989 года. Разбурэнне сцяны стала сімвалам аб’яднання Германіі і дэмакратызацыі Еўропы.
