У лякарні застаецца адзін пацярпелы ў ДТЗ з аўтобусам Гомель — Уроцлаў, астатнія выпісаныя
14 лістапада, Позірк. Восем пацярпелых у дарожна-транспартным здарэнні з удзелам аўтобуса Гомель — Уроцлаў на тэрыторыі Польшчы выпісаныя з лякарні.
Пра гэта паведамляе дзяржвыданне “Гомельская праўда” са спасылкай на дырэктара ААТ “Гомельаблаўтатранс” Дзмітрыя Старасценку.
“Адзін пацярпелы застаецца ў лякарні. Яго стан удакладняецца. Дакладна вядома, што ён не цяжкіі не крытычны. Па факце аварыі адпаведнымі службамі, як у нашай краіне, так і ў Польшчы, будзе праводзіцца праверка”, — заявіў Старасценка.
Аўтобус Гомель — Уроцлаў трапіў у ДТЗ на 382-м км дарогі А2 у Польшчы ноччу 14 лістапада, паведамілі экстранныя службы гміны Лышкавіцы (Лодзінскае ваяводства).
Аўтобус, рухаючыся ў напрамку Познані, выехаў на аварыйную паласу, прабіў бар’еры і перакуліўся на бок.
Паведамлялася, што ўсяго ў аўтобусе ехала 11 чалавек, усе яны замежнікі адносна Польшчы.
На месцы здарэння працавала шэсць пажарных падраздзяленняў, медыка-выратавальныя каманды і паліцыя.
Паводле інфармацыі Міністэрства замежных спраў Беларусі, прадстаўленай дзяржСМІ, у выніку ДТЗ пацярпела шэсць грамадзян Беларусі, яны дастаўленыя ў медыцынскія ўстановы.
Паведамлялася таксама, што амбасада Беларусі “знаходзіцца на сувязі з кампетэнтнымі структурамі, гатова аказаць неабходнае консульска-прававое садзейнічанне”.
У ДТЗ трапіў аўтобус “Ticket-bus” гомельскай фірмы ПГУП “Траса Е95”. Аб магчымых прычынах інцыдэнту не паведамляецца.
24 красавіка ў раёне горада Седльцэ (Мазавецкае ваяводства Польшчы) аўтобус Гданьск — Мінск вылецеў з дарогі ў кювет, дзе перакуліўся на бок і стукнуўся ў дрэва лабавым шклом. У аўтобусе знаходзілася 15 чалавек, сямёра з іх атрымалі траўмы.
