Коўшык узначаліць “Белсат” — АПК

15 лістапада, Позірк. Аліна Коўшык пакідае пасаду прадстаўніцы Аб’яднанага пераходнага кабінета па нацыянальным адраджэнні, яна ўзначаліць тэлеканал “Белсат”, паведамляе прэс-служба АПК.

Сам тэлеканал аб прызначэнні пакуль не паведамляе.

Паводле інфармацыі кабінета, прадстаўніцтва працягне працу.

Кіраўніца АПК Святлана Ціханоўская вітала прызначэнне і выказала ўпэўненасць, што праца Коўшык на новай пасадзе “ўзмацніць “Белсат”.

На думку Ціханоўскай, тэлеканал “мае вялікае значэнне для Беларусі і дэмакратычнага руху, ён дае беларусам не толькі аб’ектыўную інфармацыю і пляцоўку для дыскусій, але і ўмацоўвае нацыянальную ідэнтычнасць”.

“Маючы грамадска-палітычны досвед, назапашаны за апошнія гады, Аліна вяртаецца ў калектыў, які неабходна захаваць і ўмацаваць у складаны перыяд трансфармацыі тэлеканала”, — падкрэсліла дэмлідар і выказала надзею, што справа, распачатая Коўшык у АПК, “атрымае варты працяг”.

Коўшык выказала ўпэўненасць, што “беларускі дэмакратычны рух і “Белсат” непадзельныя”.

“Нас чакае шмат задач у сферы антыпрапаганды, стратэгічных камунікацый і папулярызацыі нацыянальнай культуры”, — падкрэсліла яна.

Аліна Коўшык увайшла ў склад Аб’яднанага пераходнага кабінета Беларусі ў верасні 2022 года. Да гэтага яна 15 гадоў працавала на тэлеканале “Белсат”, у тым ліку ў якасці галоўнай вядучай, рэдактара і прадзюсара тэлепраграм, была сузаснавальнікам Беларускага цэнтра салідарнасці ў Варшаве, праекта InBelKult 2.0, а таксама клуба “Беларускі Варшавы”.

Коўшык — гісторык па адукацыі. Выпускніца Гродзенскага дзяржаўнага ўніверсітэта ім. Янкі Купалы, Цэнтра Усходняй Еўропы Варшаўскага ўніверсітэта і праграмы MBA ў галіне медыя-менеджменту ў Стакгольмскай школе эканомікі ў Рызе (Латвія).

19 ліпеня на польскім партале Onet выйшаў артыкул, у якім паведамлялася, што 10 менеджэраў тэлеканала “Белсат” падазраюцца ў датычнасці да фінансавых парушэнняў на тэлеканале, у іх ліку называліся былы дырэктар тэлеканала Агнешка Рамашэўска-Гузы і яе тагачасны намеснік (а пазней выканальнік абавязкаў дырэктара) Аляксей Дзікавіцкі.

Сцвярджалася, што кіраўніцтва канала падазраюць у заключэнні без тэндэру 248 кантрактаў, многія з іх не былі выкананы.

Цяперашнія і былыя менеджары “Белсата” 23 ліпеня выступілі з заявай, у якой выказалі пратэст “супраць паклёпу”, апублікаванага 19 ліпеня парталам Onet. Дзікавіцкі адразу пасля выхаду матэрыялу напісаў на сваёй старонцы ў “Фэйсбуку”, што інфармацыя з’яўляецца “няпраўдай і паклёпам”.

8 ліпеня журналісты-расследавальнікі Radio ZET і RadioZET.pl Марыюш Гершэўскі і Радаслаў Груца заявілі, што ліквідатар Польскага грамадскага вяшчання (TVP) Даніэль Горгош “паведаміў пракуратуру аб фінансавых парушэннях” на “Белсаце”. 9 ліпеня Рамашэўска-Гузы абвергла абвінавачанні.

На пачатку ліпеня стала вядома, што “Белсат” плануецца ўключыць у склад новай медыяструктуры — Цэнтра замежных праграм (ЦЗП), які аб’яднае тэлеканалы, што вяшчаюць на замежных мовах. Дэмсілы і каманда “Белсата” заклікалі кіраўніцтва Польшчы і TVP захаваць самастойнасць беларускага тэлеканала.

Асноўная крыніца фінансавання “Белсата” — сродкі МЗС Польшчы. У сакавіку Дзікавіцкі паведамляў, што ў 2023 годзе гэты СМІ атрымаў ад ведамства 63 млн злотых (15,8 млн долараў на сёння), а на 2024 год гэтая сума скарочана да 40 млн злотых (крыху больш за 10 млн долараў). Такім чынам, фінансаванне зменшана на 36,5%.

Урад прэм’ер-міністра Дональда Туска пасля прыходу да ўлады па выніках парламенцкіх выбараў, якія адбыліся ў кастрычніку 2023 года, пачаў рэвізію грамадскіх і дзяржаўных СМІ, якія, на яго думку, адстойвалі інтарэсы толькі партыі-канкурэнта “Закон і справядлівасць”, якая кіравала да гэтага.

Тэлеканал “Белсат” створаны для вяшчання на Беларусь у 2007 годзе на падставе дагавора паміж МЗС Польшчы і TVP.