Мужчына і яго пажылыя бацькі загінулі на пажары ў Аршанскім раёне

18 лістапада, Позірк. Тры чалавекі загінула на пажары ў Аршанскім раёне (Віцебская вобласць) 17 лістапада, паведамляе Міністэрства па надзвычайных сітуацыях.

Трагедыя адбылася ўвечары у вёсцы Пашына. Падчас тушэння пажару аднапавярховага дома ратавальнікі знайшлі целы гаспадара жылля (1972 год нараджэння), яго бацькі (1948) і маці (1949).

Прычыны ўзгарання МНС не паведамляе. Следчы камітэт выказаў здагадку, што пажар мог узнікнуць праз няспраўнасць электраправодкі.

За мінулыя суткі агонь таксама забраў жыцці двух мужчын (1963 і 1978) у Мінскай вобласці — у Барысаўскім і Мінскім раёнах адпаведна.

Усяго ад пачатку года на тэрыторыі Беларусі адбылося 5.474 пажары (за аналагічны перыяд 2023-га — 5.011; +9,2%), на якіх загінула 458 чалавек (401; +14,2%), з іх дзяцей — 11 (5; павялічылася ў 2,2 раза).