Беларусам трэба вучыцца ў расіян “духоўнасці”, сцвярджае Лукашэнка
18 лістапада, Позірк. “Асаблівую духоўнасць” жыхароў суседніх з Беларуссю расійскіх рэгіёнаў адзначыў 18 лістапада Аляксандр Лукашэнка на сустрэчы ў Мінску з губернатарам Смаленскай вобласці РФ Васілём Анохіным.
“У нас ёсць чаму ў вас павучыцца. Вось гэтая культурная духоўнасць ваша. Яна нават вышэйшая, чым у нашых людзей. І нам трэба вучыцца ў пскоўскіх людзей, смалянаў. Трохі менш Бранскую вобласць ведаю. Але нам ёсць чаму павучыцца. І многае мы ў гэтым плане робім”, — сказаў Лукашэнка (па відэафрагменце ў тэлеграм-канале “Пул Першага”).
Сябе ён назваў “можна сказаць, чалавекам смаленскім”, бо нарадзіўся недалёка ад мяжы з гэтым расійскім рэгіёнам.
“Ведайце, што мы заўсёды вашы людзі і гатовыя падставіць плячо, нават на шкоду камусьці і нават на шкоду ўласным інтарэсам, калі гэта будзе трэба”, — заявіў спікер.
Паводле яго слоў, у Беларусі і Смаленскай вобласці “агульныя гісторыя, сучаснасць”. “І я абсалютна перакананы, што і будучыня ў нас павінна быць агульная. Раз’яднаць нас практычна немагчыма. Людзі жывуць, нармальна маюць зносіны, перамяшчаюцца. Калі дзесьці мы не прынялі рашэнне, я думаю, Расія і Беларусь прымуць гэтыя рашэнні — зносіны праз мяжу паміж суседнімі абласцямі. Людзі ў нас абсалютна падобныя адзін на аднаго і хай яны жывуць спакойна”, — сказаў Лукашэнка.
Раней ён неаднаразова называў “адным народам” беларусаў і расіян. Казаў пра “адзіную айчыну ад Брэста да Уладзівастока”.
У 2016 годзе ў пасланні народу і Нацыянальнаму сходу ён заявіў: “Мы, яшчэ раз падкрэсліваю, — адзін народ, як каму б то гэта не падабалася. Мы ад аднаго кораня вырасьлі — рускія і беларусы”.
У 2018 годзе на сустрэчы з прадстаўнікамі расійскіх СМІ Лукашэнка сказаў: “Мы — адзін народ. На гэтым стаялі і стаяць будзем. Так, мы можам па-рознаму размаўляць. Але памятайце: мы ніколі вам не здрадзім!”.
Таксама ён не раз называў беларусаў “рускімі са знакам якасці”.
Пры гэтым 3 лістапада 2023 года Лукашэнка назваў “адным народам фактычна” беларусаў, літоўцаў і палякаў.