Ціханоўская на канферэнцыі ў Вільнюсе абмяркуе “ключавыя пытанні еўрапейскай будучыні Беларусі”

29 лістапада, Позірк. У Вільнюсе 2 снежня пройдзе канферэнцыя “Беларусь — Літва: у будучыню праз агульныя каштоўнасці”, паведаміла прэс-служба дэмакратычнага лідара Святланы Ціханоўскай.

Адзначаецца, што “мерапрыемства стане платформай для дыялогу, у рамках якога палітыкі, даследчыкі, дзеячы культуры і прадстаўнікі грамадзянскай супольнасці абмяркуюць ключавыя пытанні еўрапейскай будучыні Беларусі, барацьбу з дэзінфармацыяй і ўмацаванне беларуска-літоўскіх адносін”.

У канферэнцыі, акрамя Ціханоўскай, возьмуць удзел першы віцэ-спікер Сейма Літвы Юозас Алекас, прадстаўнікі акадэмічнай супольнасці, журналісты, арганізацыі грамадзянскай супольнасці, пісьменнікі, аналітыкі і інш.

Праца канферэнцыі будзе арганізаваная ў чатырох панэлях: “Еўрапейская будучыня Беларусі”, “Барацьба з прапагандай і дэзінфармацыяй”, “Канструктыўнае супрацоўніцтва для ўмацавання беларуска-літоўскіх адносін”, “Культурныя сувязі як мост паміж Беларуссю і Літвой”.

Арганізатарамі канферэнцыі, якая пройдзе на беларускай і літоўскай мовах, сталі Цэнтр еўрапейскіх даследаванняў імя Вільфрыда Мартэнса, Фонд імя Конрада Адэнаўэра і Офіс Ціханоўскай.

Цэнтр еўрапейскіх даследаванняў быў створаны ў 2007 годзе былым прэм’ер-міністрам Бельгіі Вільфрыдам Мартэнсам пад эгідай Еўрапейскай народнай партыі Еўрасаюза, якая цяпер мае большасць у Еўрапарламенце. Пад эгідай цэнтра штогод праходзіць больш за 100 мерапрыемстваў.

Фонд ім. Конрада Адэнаўэра з’яўляецца палітычным фондам Федэратыўнай Рэспублікі Германіі. Сваімі праграмамі і праектамі ён “актыўна ўносіць дзейсны ўклад у міжнароднае супрацоўніцтва і паразуменне”.