Грамадзянін Беларусі затрыманы на акцыі пратэсту 29 лістапада ў Тбілісі

30 жніўня, Позірк. На акцыі пратэсту 29 лістапада ў Тбілісі затрымана 10 замежнікаў, у тым ліку грамадзянін Беларусі, паведаміла інфармагенцтва “Навіны-Грузія” са спасылкай на даныя праўрадавай тэлекампаніі “Імедзі”.

Адзначаецца, што беларуса клічуць Яўген Муравіцкі, ён 1999 года нараджэння. Апошні раз уехаў у Грузію 5 лютага 2024 года.

Апрача яго на акцыі затрымалі васьмярых расіян і аднаго грамадзяніна ЗША.

Грамадска-палітычны крызіс у Грузіі разгарэўся пасля парламенцкіх выбараў 26 кастрычніка. Кіроўная партыя “Грузінская мара”, паводле даных Цэнтрвыбаркама, атрымала 89 са 150 дэпутацкіх крэслаў. Апазіцыйныя сілы абвінавацілі палітычных канкурэнтаў у фальсіфікацыях і не прызналі вынікі выбараў. Аб’яднанні “Кааліцыя за перамены”, “Моцная Грузія” і “Адзінства — Нацыянальны рух”, якія прайшлі ў парламент, адмовіліся ў агульнай складанасці ад 49 дэпутацкіх мандатаў (партыя “За Грузію” на такі крок не пайшла, але выбары не прызнала).

У першым пасяджэнні новага склікання заканадаўчага органа 25 лістапада ўдзельнічалі толькі дэпутаты ад “Грузінскай мары”, якія, нягледзячы на рашэнне апазіцыі адмовіцца ад крэслаў, прагаласавалі за прызнанне паўнамоцтваў усяго парламента.

Прэзідэнт Грузіі Саламе Зурабішвілі назвала сход неканстытуцыйным, паколькі яна як адзіная службовая асоба, што мае ў адпаведнасці з Асноўным законам паўнамоцтвы прызначаць першае пасяджэнне парламента новага склікання, гэтага не зрабіла.

З таго дня ў Тбілісі пачаліся акцыі пратэсту супраць дзеянняў “Грузінскай мары”.

28 лістапада парламент, на пасяджэнні якога зноў прысутнічалі толькі прадстаўнікі “Грузінскай мары”, зацвердзіў склад урада, прапанаваны яго кіраўніком Іракліем Кабахідзэ (экс-старшыня кіроўнай партыі).

Прэм’ер-міністр сярод іншага абвясціў перад дэпутатамі рашэнне замарозіць перагаворы аб членстве ў ЕС да 2028 года. Яго заява справакавала новы віток пратэстаў.

У ноч на 29 і на 30 лістапада ў Тбілісі прайшлі маштабныя акцыі прыхільнікаў еўрапейскага шляху развіцця Грузіі (на першай прысутнічала прэзідэнт краіны). Для іх падаўлення ўлады выкарысталі спецсродкі — вадамёты, слёзацечны газ. Экіпіяваныя сілавікі жорстка збівалі пратэстоўцаў. За гэтыя дні затрымалі каля 150 чалавек.

Акцыі пратэсту таксама адбыліся ў іншых гарадах Грузіі.

Многія супрацоўнікі дзяржаўных структур выступілі супраць абвешчанага Кабахідзэ рашэння, звярнуўшы ўвагу на тое, што працэс уступлення ў ЕС замацаваны ў Канстытуцыі краіны. Двое грузінскіх амбасадараў падалі ў адстаўку на знак пратэсту супраць рашэння ўрада.

Пратэсты працягваюцца. Нязгодныя з дзеяннямі “Грузінскай мары” патрабуюць правядзення новых парламенцкіх выбараў.