СБУ падазрае былога кіраўніка БПЦ Паўла ў “дапамаганні захопу храмаў” на акупаваных тэрыторыях Украіны

9 снежня, Позірк. Служба бяспекі Украіны (СБУ) завочна паведаміла аб падазрэнні расейскім святарам, якія “спрыялі захопу храмаў на часова акупаваных тэрыторыях Украіны”, паведамляе прэс-служба ведамства.

Адзначаецца, што сабраная “маштабная доказная база на чатырох высокапастаўленых расійскіх клірыкаў, якія распаўсюджваюць крамлёўскі рэжым на часова акупаванай частцы тэрыторыі Украіны”.

Гаворка ў тым ліку ідзе пра мітрапаліта Круціцкага і Каломенскага, патрыяршага намесніка Маскоўскай мітраполіі Паўла (Георгій Панамароў). У Беларусі яго памятаюць як кіраўніка Беларускай праваслаўнай царквы Маскоўскага патрыярхату (25 снежня 2013 года — 25 жніўня 2020 года).

Усім чацвярым завочна паведамлена аб падазрэнні па ч. 5 арт. 27, ч. 3 арт. 110 КК (дапамаганне ў здзяйсненні наўмысных дзеянняў з мэтай змены межаў тэрыторыі або дзяржаўнай мяжы Украіны, па папярэдняй змове групай асоб, якія прывялі да іншых цяжкіх наступстваў).

“Цяпер працягваюцца комплексныя мерапрыемствы для прыцягнення зламыснікаў да адказнасці за злачынствы супраць нашай дзяржавы”, — гаворыцца ў паведамленні СБУ.

17 жніўня 2020 года, праз восем дзён пасля прэзідэнцкіх выбараў, прэс-служба БПЦ паведамляла пра “пастырскі візіт” мітрапаліта Паўла ў сталічную бальніцу хуткай медыцынскай дапамогі.

“У цяперашні час частка пацыентаў бальніцы — людзі, якія атрымалі траўмы падчас акцый пратэсту, што адбыліся на пачатку мінулага тыдня. Сярод іх як удзельнікі мітынгаў, так і выпадковыя людзі. У бальніцы знаходзяцца таксама тыя, хто паступіў са слядамі збіцця і цяжкіх цялесных пашкоджанняў з ізалятара часовага ўтрымання на вуліцы Акрэсціна. Пацярпелым людзям нанесены моцны фізічны і псіхалагічны ўрон”, — гаварылася ў паведамленні БПЦ.

Пацярпелым экзарх паведаміў, што царква моліцца аб іх “найхутчэйшым ачунянні”, і выказаў надзею на “справядлівае расследаванне злачынстваў, учыненых падчас нядаўніх пратэстных акцый”.

Павел нагадаў, што “царква, знаходзячыся па-за палітыкай, у той жа час асуджае любы гвалт, знаходзіцца разам з усімі людзьмі, падзяляе іх боль, суперажывае іх пакутам, моліцца пра іх і пра іх блізкіх”.

Паводле распараджэння Аляксандра Лукашэнкі пакарання за перавышэнне паўнамоцтваў не панёс ні адзін супрацоўнік сілавых структур.