Беларускае войска атрымала чарговую батарэю ЗРК “Тор-М2”, яна будзе прыкрываць Мінск

11 снежня, Позірк. Чарговая батарэя зенітных ракетных комплексаў “Тор-М2” паступіла ва Узброеныя сілы, у бліжэйшы час яе разлікі заступяць на баявое дзяжурства для аховы “паветраных межаў сталіцы”, паведаміла 11 снежня прэс-служба Міністэрства абароны.

Камандуючы Вайскова-паветранымі сіламі і войскамі супрацьпаветранай абароны УС Андрэй Лук’яновіч заявіў, што Беларусь “захоўвае мірную накіраванасць сваёй палітыкі, робячы стаўку на кампактнае, але добра падрыхтаванае і абрыштаванае войска”.

Паводле яго слоў, у 2024 годзе ў рамках мадэрнізацыі і пераўзбраення ў ВПС і войскі СПА паступіла больш за 40 узораў узбраення, вайсковай і спецыяльнай тэхнікі.

Галоўнай задачай беларускай арміі, заявіў военачальнік, “было і застаецца забеспячэнне мірнага неба”. У той жа час ён абвінаваціў “заходніх суседзяў” у тым, што яны нібыта “праводзяць курс на мілітарызацыю, кратна павялічваючы вайсковыя бюджэты, нагнятаючы ваенна-палітычную абстаноўку вакол” Беларусі.

“Напярэдадні будучай галоўнай палітычнай падзеі (гаворка пра прэзідэнцкія выбары, прызначаныя на 26 студзеня 2025 года. — “Позірк”.) нас правяраюць на трываласць і здольнасць забяспечыць мір і бяспеку на беларускай зямлі”, — сцвярджае Лук’яновіч.

21 лістапада Мінабароны паведаміла, што ў Беларусь была дастаўлена чарговая батарэя ЗРК “Тор-М2”, што дапрацаваная “расійскімі канструктарамі з улікам досведу” выкарыстання гэтага ўзбраення на вайне супраць Украіны.

Амерыканскі Інстытут вывучэння вайны (ISW) тады выказаў здагадку, што кантроль над яе выкарыстаннем будзе ў Расіі. Расійскія вайскоўцы, на думку аналітыкаў, інтэгруюць гэтыя новыя сістэмы ў сумесную рэгіянальную сістэму супрацьпаветранай абароны.