Плошчы нявыкарыстанай дзяржаўнай маёмасці павялічыліся за год на 2,7%

11 снежня, Позірк. Па выніках студзеня — кастрычніка 2024 года плошчы нявыкарыстанай у Беларусі дзяржаўнай маёмасці павялічыліся да 3 млн 321 тыс. 261 квадратнага метра (годам раней — 3 млн 235 тыс. 454 кв. м; +2,7%), вынікае з праведзенага “Позіркам” аналізу даных Нацыянальнага статыстычнага камітэта.

У Віцебскай вобласці не запатрабавана было 917.837 кв. м (920.879; -0,3%) дзяржаўнай маёмасці. Далей ідуць: Гродзенская вобласць — 735.277 (773.631; +5%), Магілёўская — 499.747 (471.457; +6%), Мінская — 478.283 (+379.668; +26%), Гомельская — 320.900 (266.460; +20,4%), Брэсцкая — 242.028 (243.373; -0,6%), Мінск — 127.189 (179.986; -29,3%).

Найбольшую запазычанасць перад бюджэтам па пералічэнні сродкаў, атрыманых ад арэнды аб’ектаў дзяржаўнай маёмасці, мае Гродзенская вобласць — 342 тыс. рублёў (63,6 тыс.; рост у 5,4 разы). Далей: Мінская вобласць — 154,7 тыс. (5,2 тыс.; у 29,8 разы), Віцебская — 69,1 тыс. (31,8 тыс.; у 2,2 разы), Гомельская — 57,1 тыс. (54 тыс.; +5,7%), Брэсцкая — 12,4 тыс. (0,1 тыс.; у 124 разы), Магілёўская — 1,6 тыс. (1,4 тыс.; +14,3%). Мінск запазычанасцяў не мае.

У Беларусі з 1 красавіка пастановай урада № 200 ад 21 сакавіка 2024 года на 5,1% павышана базавая арэндная велічыня (з 16,90 да 17,76 рубля).

Папярэдні яе памер быў устаноўлены з 1 красавіка 2022 года шляхам зніжэння на 5,3% (з 17,85 рубля). Фактычна адбылося вяртанне да ранейшага значэння (16,90), якое дзейнічала з 1 красавіка 2019 года да 31 сакавіка 2020 года.

Памер базавай арэнднай велічыні штогод усталёўваецца Саветам міністраў (фармальна — з улікам змены індэкса спажывецкіх цэн за папярэдні год) і прымяняецца з 1 красавіка бягучага года.

На аснове базавай арэнднай велічыні вызначаецца памер арэнднай платы пры здачы ў арэнду нерухомай маёмасці, якая знаходзіцца ў дзяржаўнай уласнасці, а таксама ўласнасці гаспадарчых таварыстваў.