Лукашэнка зацвердзіў бюджэт на 2025 год

13 снежня, Позірк. Рэспубліканскі бюджэт на 2025 год зацверджаны ўказам Лукашэнкі, паведамляе яго прэс-служба.

Закон пра бюджэт распрацаваны на падставе палажэнняў праграмных дакументаў па сацыяльна-эканамічным развіцці Беларусі “з улікам існуючай эканамічнай сітуацыі”.

“Захоўваецца сацыяльная накіраванасць выдаткаў — значную іх частку складуць выдаткі на аплату працы, выплату пенсій, стыпендый, дапамог, а таксама на выкананне дзяржаўных сацыяльных стандартаў”, — сцвярджае прэс-служба.

12 снежня Савет Рэспублікі Нацыянальнага сходу ўхваліў праект рэспубліканскага бюджэту на 2025 год. Старшыня СР НС Наталля Качанава заявіла, што рэспубліканскі бюджэт сфармаваны збалансавана: “Радуе тое, што па ўсіх кірунках — і ахова здароўя, і адукацыя, і сацыяльная абарона — усюды ёсць рост, прычым сур’ёзны”.

5 снежня праект закона аб рэспубліканскім бюджэце на 2025 год прыняла ў другім чытанні Палата прадстаўнікоў Нацсходу. У першым чытанні законапраект быў ухвалены 31 кастрычніка.

Даходы прадугледжваюцца ў суме 45 млрд 835,8 млн рублёў (+8,1% да ацэнкі паступленняў у 2024 годзе), выдаткі — 50 млрд 295,2 млн рублёў (+12%).

У параўнанні з бюджэтам бягучага года ў 2025-м даходы плануецца павялічыць на 5 млрд 929,4 млн рублёў (+14,9% да пачатковай зацверджанай сумы), выдаткі — на 5 млрд 637,7 млн (+12,6%).

Дэфіцыт бюджэту ацэньваецца ў 4 млрд 459,4 млн рублёў.

Міністр фінансаў Юры Селівёрстаў раней адзначаў (https://pozirk.online/be/news/101510/), што практычна 1 млрд рублёў з дэфіцыту бюджэту плануецца пагасіць за кошт “знешніх прыцягненняў”: “Частка гэтых сродкаў будзе прыцягнутая з РФ у выглядзе крэдыту”.

На брыфінгу 22 кастрычніка старшы навуковы супрацоўнік даследчага цэнтра BEROC Анатоль Харытончык выказаў меркаванне (https://pozirk.online/be/news/110580/), што запланаваны ў бюджэце на 2025 год дэфіцыт “не з’яўляецца падставай для сур’ёзнай размовы”.

Прэм’ер-міністр Раман Галоўчанка, каментуючы запланаваны дэфіцыт, заявіў, што ўрад заўсёды фармуе бюджэт, “зыходзячы з кансерватыўна-песімістычных прагнозаў для таго, каб потым была магчымасць манеўру”. “Калі эканоміка спрацуе лепш, дэфіцыт закрыецца, калі не, будзем аптымізаваць нейкія бюджэтныя выдаткі”, — сказаў ён.