Мінск адмаўляе дапамогу агрэсіі РФ ва Украіне, хоча прадугледзець свае інтарэсы пры мірных перамовах

16 снежня, Позірк. “Фінальныя дамоўленасці па ўрэгуляванні канфлікту ва Украіне” павінны “абавязкова ўлічваць і інтарэсы Беларусі”, заявіў намеснік міністра замежных спраў Юрый Амбразевіч на пасяджэнні кансультатыўнага савета па справах беларусаў замежжа.

Чыноўнік, словы якога перадаюць дзяржаўныя СМІ, сцвярджае, што Беларусь “як ніхто іншы” зацікаўленая ў “мірным урэгуляванні канфлікту” ва Украіне, паколькі “ніводная краіна не хоча, каб ля яе межаў палалі ўзброеныя дзеянні”.

“І на гэтым фоне абсурдна выглядаюць абвінавачанні нашай краіны ў дапамозе агрэсіі. Месцячыся па суседстве з Украінай, Беларусь як ніхто іншы зацікаўленая ў найхутчэйшым мірным урэгуляванні гэтага канфлікту”, — сказаў Амбразевіч.

З гэтай прычыны, сцвярджае намеснік кіраўніка знешнепалітычнага ведамства, Беларусь ад самага пачатку рабіла “міратворчыя крокі па прадухіленні эскалацыі канфлікту” і прэтэндуе “на месца за сталом мірным перагаворам па Украіне, калі яны пачнуцца”.

“Для нас важна атрымаць гарантыі нашай уласнай бяспекі”, — падкрэсліў ён.

Амбразевіч дадаў, што Беларусь “не можа не турбаваць, што ўзброены канфлікт ва Украіне, які працягваецца, ужо перайшоў на расійскую тэрыторыю”. “Мы бачым, што праз складаную сітуацыю на фронце для ўкраінскіх войскаў у свеце расце запыт на дыпламатычнае вырашэнне канфлікту”, — заявіў прадстаўнік МЗС.

Беларускія ўлады рэгулярна заяўляюць пра сваю міралюбнасць, аднак словы ідуць уразрэз з рэальнымі дзеяннямі афіцыйнага Мінска.

24 лютага 2022 года Расія пачала поўнамаштабную вайну супраць Украіны. Рэжым Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а потым на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў.

21 ліпеня 2022 года ў інтэрв’ю французскаму інфармацыйнаму агенцтву “Франс Прэс” Лукашэнка прызнаў, што з Беларусі ва Украіну была ўведзена 20-тысячная групоўка расійскіх войскаў. Пасля паўночныя тэрыторыі былі вызваленыя.

11 красавіка 2023 года першы намеснік міністра абароны Украіны Аляксандр Паўлюк заявіў, што на пачатку вайны 70 тыс. вайскоўцаў 35-й агульнавайсковай арміі РФ на 7 тыс. бронемашынах “з беларускай мяжы ўварваліся” на тэрыторыю Кіеўскай вобласці.

У інтэрв’ю “Бі-бі-сі” 23 кастрычніка 2024 года Лукашэнка стаў адмаўляць, што Беларусь надала РФ тэрыторыю для ўварвання. Паводле яго слоў, Расія нібыта выводзіла свае войскі, якія знаходзіліся на беларускай тэрыторыі ў перыяд вучэнняў, але іх “справакавалі”, у выніку чаго прэзідэнт РФ Уладзімір Пуцін “завярнуў на Кіеў”. Навошта гэта нібыта было зроблена, Лукашэнка параіў “спытаць у Зяленскага”.

У тым ліку за саўдзел у расійскай агрэсіі заходнія краіны ўвялі санкцыі супраць прадстаўнікоў рэжыму Лукашэнкі і шмат якіх прадпрыемстваў краіны.