У Брэсце за спробу рэалізацыі псіхатропаў затрыманы грамадзянін Кыргызстана

17 снежня, Позірк. У Брэсце затрыманы грамадзянін Кыргызстана, які меў намер распаўсюдзіць 1,5 кг псіхатропу 4-СМС, паведамляе Дзяржаўны мытны камітэт (ДМК).

Ведамства адзначае, што “месцазнаходжанне 24-гадовага злачынцы, а таксама план яго дзеянняў устаноўлены пры правядзенні аператыўна-вышуковых мерапрыемстваў”. Паведамляецца, што мужчына прыбыў з Кыргызстана і “па заданні куратара так званай інтэрнэт-крамы, заняўся ў Беларусі рэалізацыяй псіхатропу”.

Мужчыну затрымалі пры размяшчэнні ў абласным цэнтры чарговай закладкі з псіхатропам, яшчэ некалькі схованак з 4-СМС былі знойдзеныя “на тэрыторыі горада”, астатнюю частку канфіскавалі ў арэнднай кватэры затрыманага, гаворыцца ў рэлізе.

Распачата крымінальная справа паводле ч. 3 ст. 328 КК (незаконны абарот наркатычных сродкаў, псіхатропных рэчываў, іх прэкурсораў і аналагаў). Іншаземец змешчаны ў ізалятар часовага ўтрымання, падкрэсліваецца, што яму пагражае пазбаўленне волі тэрмінам да 15 гадоў.

За 9 месяцаў 2024 года органамі ўнутраных спраў Беларусі канфіскавана 462,1 кг наркатычных сродкаў, псіхатропных рэчываў і іх прэкурсораў — у 1,4 разы менш, чым за аналагічны перыяд мінулага года.

За студзень — верасень зарэгістравана 2.908 нарказлачынстваў, з якіх 1.450 звязаны са збытам [забароненых рэчываў]. Устаноўлена 1.576 асоб, якія здзейснілі злачынствы ў сферы наркакантролю, з іх 590 — нарказбытчыкаў.