Дзяржагенцтва БелТА размясціла, скарэктавала і зняла нататку пра “сіянісцкі рэжым” у Ізраілі

17 снежня, Позірк. “Сіянісцкім рэжымам” назвала ізраільскія ўлады беларускае дзяржаўнае інфармагенцтва БелТА.

У паведамленні аб ракетнай атацы Емена на Ізраіль, апублікаваным адразу пасля паўночы 17 снежня, ізраільскія СМІ названыя “сіянісцкімі медыя-крыніцамі” і “сіянісцкімі СМІ”, Армія абароны Ізраіля (ЦАХАЛ) — “сіянісцкай арміяй”.

Дэ-факта беларускае дзяржагенцтва скапіравала і без рэдакцыйнай праўкі размясціла рускамоўнае паведамленне іранскага інфармацыйнага агенцтва ІРНА.

На публікацыю, паводле звестак “Позірку”, звярнулі ўвагу замежныя дыпламаты, якія працуюць у Мінску. Скрыншот нататкі пачаў распаўсюджвацца ў сацыяльных сетках. Яе пракаментаваў у сваім тэлеграм-канале палітычны аналітык Аляксандр Фрыдман: “Галоўнаму інфармацыйнаму агенцтву Беларусі ўжо мала рэтрансляваць расійскую прапаганду. Цяпер яно вырашыла стаць рупарам Тэгерана і называе Ізраіль “сіянісцкім рэжымам”.

Спасылку на нататку БелТА размясціў як мінімум адзін орган дзяржаўнай улады — Віцебскі райвыканкам.

Праз некаторы час БелТА змяніла фармулёўкі на нейтральныя, а потым і цалкам прыбрала нататку з сайта (гл. скрыншоты ніжэй).

Аляксандр Лукашэнка неаднаразова выказваўся пра яўрэяў з антысеміцкіх пазіцый, што прыводзіла да дыпламатычных скандалаў.

Гл. па тэме:

Фрыдман: Уяўленні Лукашэнкі пра габрэяў заснаваныя на забабонах савецкага часу

Кіраўнік МЗС Ізраіля: Антысеміцкія выказванні Лукашэнкі абуральныя і непрымальныя

У сувязі з антысеміцкімі выказваннямі Лукашэнкі ў Ізраілі адменена канферэнцыя да 80-годдзя вызвалення Беларусі (падрабязна)