Рыжанкоў абвінаваціў фінансавыя інстытуты ў наўмысным заніжэнні прагнозаў па эканоміцы Беларусі
28 снежня, Позірк. Беларуская эканоміка “расце тэмпамі, якія значна перавышаюць прагнозныя”, пра што сведчыць “як нацыянальная статыстыка, так і ацэнкі міжнародных фінансавых арганізацый”, заявіў кіраўнік МЗС Максім Рыжанкоў у інтэрв’ю часопісу “Эканоміка Беларусі”, якое перадрукаваў сайт знешнепалітычнага ведамства.
“У прыватнасці, паводле апошніх прагнозаў Сусветнага банка, у 2024 годзе ВУП Беларусі павялічыцца на 4%, а ў 2025 годзе — на 1,2%, — сказаў чыноўнік. — Хоць яшчэ сёлета ў чэрвені ацэнка была значна больш сціплай — 1,2% і 0,7% адпаведна. І, мяркую, усе прагнозы такіх структур адносна нашай краіны цалкам наўмысна заніжаюцца. Карэктуюць яны іх толькі тады, калі ўжо зусім няма выхаду і ўсё відавочна”.
Паводле слоў Рыжанкова, на фоне заходніх санкцый Мінску давялося “ў пэўнай частцы адаптаваць эканоміку”. Асноўнай задачай стала “хуткая і эфектыўная пераарыентацыя экспартных патокаў, у тым ліку замяшчэнне рынкаў, якія выпалі, пабудова новых лагістычных схем і ў цэлым перабалансаванне знешняга гандлю”, адзначыў ён.
“Да беларускай кіраўніцкай і эканамічнай мадэлі некаторыя “добразычліўцы”, асабліва на Захадзе, ставіліся з непрыхаваным скепсісам, — заявіў ён. — Больш за тое, вялізныя намаганні калектыўнага Захаду скіраваныя акурат на тое, каб справакаваць у Беларусі фінансава-эканамічны крызіс, нанесці прамую шкоду цэлым сектарам эканомікі. І гэта нават не хавалася, гаварылася ў адкрытую”.
“Аднак на справе беларуская сістэма ў чарговы раз паказала сваю стрэсаўстойлівасць і эфектыўнасць, прытым такую, пра якую многія краіны сёння могуць толькі марыць. Чым насамрэч можна ганарыцца, бо гэта рукатворны вынік”, — сцвярджае кіраўнік МЗС.
Як паведамляў “Позірк”, у восеньскім аглядзе Сусветны банк (СБ) істотна палепшыў свой прагноз па росце эканомікі Беларусі. На думку аналітыкаў СБ, валавы ўнутраны прадукт краіны па выніках 2024 года вырасце на 4%. У вясновым аглядзе прагноз быў нашмат больш сціплым — 1,2%. Разам з тым СБ мяркуе, што ў 2025-м эканоміка вырасце на 1,2% (раней прагноз быў +0,7%), па выніках 2026-га — на 0,8% (+0,5%).
Следам за СБ прагноз па стане беларускай эканомікі палепшыў Міжнародны валютны фонд. Аналітыкі гэтага фінансавага інстытута мяркуюць, што ВУП краіны па выніках 2024 года вырасце на 3,6%, 2025-га — на 2,3%.
Згодна з першай ацэнкай Нацыянальнага статыстычнага камітэта, апублікаванай у сярэдзіне снежня, ВУП Беларусі за студзень — лістапад 2024 года склаў 224,2 млрд рублёў. У супастаўных цэнах гэта на 3,9% больш, чым за аналагічны перыяд 2023-га.
У студзені рост эканомікі склаў 2,8%, студзені — лютым — 4%, студзені — сакавіку — 4,1%, студзені — красавіку — 5,1%, студзені — траўні — 5,2%, студзені — чэрвені — 5%, студзені — ліпені — 5,5%, студзені — жніўні — 4,9%, студзені — верасні — 4,5%, студзені — кастрычніку — 4,2%.
Згодна з важнейшымі прагнознымі (дэ-факта планавымі) параметрамі развіцця краіны на 2024 год, прырост ВУП павінен скласці 3,8%.
Гл. таксама: