Яшчэ да завяршэння будаўніцтва трэцяй веткі мінскага метро ўлады пачалі праектаваць чацвёртую
старшыня Мінгарвыканкама Уладзімір Кухараў (справа)
30 снежня, Позірк. У Мінску пачынаюць праектаваць новую лінію метро, паведаміў старшыня гарвыканкама Уладзімір Кухараў Аляксандру Лукашэнку 30 снежня падчас цырымоніі адкрыцця трох новых станцый трэцяй лініі метрапалітэна.
Паводле слоў кіраўніка сталіцы, згодна з генеральным планам, чацвёртая — кальцавая — лінія метро з 17 станцыямі працягнецца на 25 кіламетраў.
У 16:00 30 снежня адчыняцца дзверы станцый “Аэрадромная”, “Немаршанскі Сад” і “Слуцкі Гасцінец” трэцяй лініі метро. 7 лістапада 2020 года былі адкрытыя станцыі “Юбілейная плошча”, “Плошча Францішка Багушэвіча”, “Вакзальная” і “Кавальская Слабада”. Папярэдне ў 2029 годзе запрацуюць станцыі “Прафсаюзная”, “Пярэспа”, “Камароўская” і “Парк Дружбы народаў”.
Будаўніцтва чацвёртай веткі плануюць пачаць пасля здачы станцыі “Парк Дружбы народаў”. Паводле інфармацыі сталічных уладаў, яго будуць весці з улікам вялікага мікрараёна “Паўночны бераг” і мікрараёнаў, дзе пражывае звыш 800 тыс. чалавек (Фрунзенскі і Маскоўскі раёны).
Паводле слоў Лукашэнкі, якія прыводзіць яго прэс-служба, будаўніцтва метро ідзе “быццам добра, але катастрафічна марудна”. “Трэба хутчэй у два разы. Не трэба пад зямлю заганяць палацы. Лепш мы зробім годна, прасцей, але больш. Давайце разам будзем планаваць развіццё гэтага дарагога, але вельмі патрэбнага віду транспарту для нашых мінчан”, — адзначыў спікер.
