Эвакуацыйная частка каманды BySol пачала самастойную дзейнасць
2 сакавіка, Позірк. Каманда эвакуацыі з Беларусі, якая працавала сумесна з фондам BySol, 2 сакавіка пачала самастойную дзейнасць як ініцыятыва ProEvac.
У сваім тэлеграм-канале новая ініцыятыва паведаміла, што выбудавала “ўстойлівую сістэму дапамогі“, адпрацавала пратаколы бяспекі і набыла “значны практычны досвед у эвакуацыі людзей з зоны рызыкі“.
“Для нас важна захоўваць магчымасць самастойнага развіцця. Кірунак эвакуацыі ў BySol працягвае працаваць у сваім фармаце”, — гаворыцца ў паведамленні.
Ранейшыя кантакты і механізмы “працягваюць функцыянаваць як звычайна, у фармаце незалежнай ініцыятывы ProEvac“.
Служба эвакуацыі фонду BySol, у сваю чаргу, паведаміла пра абнаўленне формы прыёму заявак і адзначыла, што “кірунак працуе ў стандартным рэжыме, унутраныя змены не ўплываюць на магчымасць атрымання падтрымкі ў экстранай рэлакацыі“.
Фонд салідарнасці заснаваны ў 2020 годзе на фоне палітычных падзей у Беларусі, якія пацягнулі беспрэцэдэнтныя рэпрэсіі і масавую эміграцыю з краіны. Займаецца зборам сродкаў для падтрымкі ахвяр рэпрэсій, арганізацыяй эвакуацыі людзей з Беларусі і іншай дапамогай тым, хто церпіць пераслед з палітычных матываў.
Паводле папярэдніх звестак, за 2025 год BySol сабраў больш за 1,25 млн еўра ахвяраванняў для беларусаў, якія маюць патрэбу.
Агулам у 2025 годзе было праведзена каля 250 персанальных збораў, у тым ліку 12 — для беларускіх добраахвотнікаў ва Украіне. Пры гэтым, паводле звестак фонда, і колькасць данатаў, і іх сярэдні памер павялічваюцца.
21 ліпеня 2025 года на “Еўрарадыё“ выйшаў матэрыял пра кіраўніка фонда “Андрэй Стрыжак і няпрошаныя дыкпікі“. У ім сцвярджалася, што Стрыжак высылаў беларускім актывісткам і жанчынам-праваабаронцам фота інтымнага зместу без іх згоды.
23 ліпеня BySol паведаміў аб адхіленні Стрыжака ад “кіруючай пасады“ і “выканання прадстаўніцкіх функцый”, а таксама пра пачатку разбіральніцтва.
24 верасня BySol праінфармаваў, што спецыяльна створаная камісія рэкамендавала цалкам спыніць супрацоўніцтва са Стрыжаком пасля разгляду “12 кейсаў харасменту“.
Cёлета 2 студзеня Стрыжак паведаміў пра старт новай ініцыятывы дапамогі BelAid.
