Больш за 300 чалавек ліквідуюць наступствы непагадзі ў Гродне
2 жніўня, Позірк. У Гродне працягваецца ўстараненне наступстваў непагадзі, у ім задзейнічана больш за 300 чалавек, паведамляе мясцовы гарвыканкам.
Гэта працаўнікі МНС і камунальных службаў. Задзейнічана больш за 50 адзінак спецыяльнай тэхнікі.
“Сілы кінуты на расчыстку дарог і ліўневай каналізацыі, уборку паваленых дрэў, адпампоўку вады, — гаворыцца ў рэлізе. — Усе камунальныя службы горада працягваюць працаваць у кругласутачным рэжыме да поўнага ўстаранення наступстваў непагадзі”.
Пры гарвыканкаме прайшло пазачарговае паседжанне камісіі па надзвычайных сітуацыях.
Як паведамлялася, ноччу цэнтр горада быў затоплены.
