Энергетыкі Беларусі і РФ трэніраваліся ліквідаваць парушэнні працы энергасістэм пасля выхаду краін Балтыі з БРЭЛЛ
31 снежня, Позірк. Забеспячэнне “надзейнай сінхроннай працы” энергасістэм Беларусі і Расіі “ў новых умовах” адпрацоўвалася на “міжнароднай міжсістэмнай аварыйнай трэніроўцы”, паведамляе прэс-служба вытворчага аб’яднання “Белэнерга”.
Адзначаецца, што трэніроўка прайшла ў Маскве на базе Цэнтра падрыхтоўкі персаналу Сістэмнага аператара пры ўдзеле дыспетчараў “Белэнерга”.
Нагодай для яе правядзення стала будучае адключэнне міждзяржаўных ліній сувязі і спыненне паралельнай працы ў рамках электракольца БРЭЛЛ — у святле запланаванай на люты 2025 года дэсінхранізацыі энергасістэм краін Балтыі з Аб’яднанай энергасістэмай Беларусі і Адзінай энергетычнай сістэмы РФ.
Паводле інфармацыі “Белэнерга”, на трэніроўцы “адпрацоўваліся сумесныя дзеянні дыспетчарскага персаналу па прадухіленні развіцця і ліквідацыі парушэння нармальнага рэжыму паралельнай працы энергасістэм Расіі і Беларусі”. Пры гэтым выкарыстоўваліся “інструкцыі і рэгламенты ўзаемадзеяння, падрыхтаваныя для працы ў новых умовах”.
Сцэнарый “улічваў найбольш складаныя схемна-рэжымныя ўмовы, звязаныя са стратай буйнога генеравальнага абсталявання ў АЭС Беларусі, паслабленнем вонкавых электрычных сувязяў з энергасістэмай Расіі, у выніку якіх узнікалі перагрузкі ў міждзяржаўным сячэнні, з пагрозай адключэння ліній электраперадачы і падзелам на несінхронна працоўныя часткі энергасістэмы”.
Дыспетчары “Белэнерга” разам з калегамі “рэалізавалі комплекс мер па прадухіленні развіцця і ліквідацыі аварыі”. Пасля заканчэння трэніроўкі, як сцвярджаецца, быў адзначаны “высокі прафесіяналізм і зладжанасць дзеянняў персаналу ў забеспячэнні надзейнай сінхроннай працы энергасістэм дзвюх краін у складаных аварыйных умовах”.
Паведамляецца, што “намечаны шэраг мерапрыемстваў арганізацыйнага і тэхнічнага характару для нівелявання наступстваў зменлівых рэжымаў працы і тапалогіі электрычнай сеткі 330 кВ”.
10 ліпеня 2024 года ў Юрмале адказныя за сферу энергетыкі міністры Латвіі, Літвы і Эстоніі пацвердзілі гатоўнасць сваіх краін адлучыцца ад энергасістэм Беларусі і РФ і сінхранізавацца з еўрапейскай кантынентальнай сеткай ENTSO-E.
16 ліпеня аператары сістэмы перадачы электраэнергіі Litgrid (Літва), AST (Латвія) і Elering (Эстонія) накіравалі беларускім і расійскім калегам апавяшчэнне пра тое, што не будуць падаўжаць дагавор аб працы энергаколца БРЭЛЛ.
Міністэрства энергетыкі Беларусі, каментуючы гэтыя дзеянні 17 ліпеня, заявіла, што наступствы выхаду краін Балтыі з БРЭЛЛ “адаб’юцца перш за ўсё на спажыўцах гэтых дзяржаў”.
Тэрмін дзеяння дагавора аб БРЭЛЛ заканчваецца 7 лютага 2025 года. На наступны дзень тры балтыйскія дзяржавы адлучацца ад энергасістэм Беларусі і РФ, правядуць сумесныя выпрабаванні, а 9 лютага сінхранізуюцца з еўрапейскай сеткай.
Раней Вільнюс спрабаваў пераканаць Рыгу і Талін адлучыцца ад Беларусі і РФ на пачатку 2024 года. Тыя заяўлялі, што гэта немагчыма, у тым ліку праз эканамічныя выдаткі.
22 красавіка 2023 года Літва паспяхова пратэставала працу нацыянальнай энергасістэмы ў адрыве ад сістэм Беларусі і РФ. Упершыню за ўсю гісторыю незалежнасці краіна самастойна кантралявала частату току і рэгулявала вытворчасць электраэнергіі.