БДУІР будзе супрацоўнічаць з расійскай ВНУ, якая спрыяе вядзенню вайны супраць Украіны
Віктар Стэмпіцкі (БДУІР) і Анастасія Новікава (НаўДУ)
2 студзеня, Позірк. Пагадненне аб навукова-тэхнічнай супрацы падпісалі Беларускі дзяржаўны ўніверсітэт інфарматыкі і радыёэлектронікі і Наўгародскі дзяржаўны ўніверсітэт, паведаміла 2 студзеня прэс-служба расійскай ВНУ.
Сцвярджаецца, што бакі будуць супрацоўнічаць “у інтарэсах развіцця Цэнтра паўправадніковага матэрыялазнаўства НаўДУ”.
Прарэктар па знешніх сувязях і міжнароднай дзейнасці НаўДУ Анастасія Новікава заявіла, што БДУІР мае “велізарны досвед адукацыйнай і навуковай працы ў сферы радыёэлектронікі”, а таксама наладжаную супрацу з ВНУ Кітая.
“Наша задача — абмен кампетэнцыямі паміж універсітэтамі, у тым ліку для развіцця крэмніева-германіевых тэхналогій паўправаднікоў, — сказала яна. — Цэнтр паўправадніковага матэрыялазнаўства ўжо аснашчаны абсталяваннем. Можна праводзіць даследаванні, атрымліваць новыя матэрыялы, вывучаць іх уласцівасці і вырабляць чыпы”.
ВНУ маюць намер абменьвацца студэнтамі і арганізоўваць стажыроўкі аспірантаў радыётэхнічных спецыяльнасцей.
Прарэктар БДУІР па навуковай працы Віктар Стэмпіцкі заявіў, што беларуская навучальная ўстанова разлічвае на “сумесныя даследаванні ў сферы радыёэлектронікі”, а таксама зацікаўленая ў “стварэнні адукацыйных інжынерных праграм у рамках Саюзнай дзяржавы”.
Праведзены “Позіркам” аналіз паведамленняў прэс-службы НаўДУ сведчыць, што гэтая расійская ВНУ актыўна спрыяе вядзенню РФ вайны ва Украіне.
Напрыклад, у лістападзе 2024 года ўніверсітэт абвясціў, што яго навукоўцы распрацавалі “унікальны камуфляжны рыштунак”, прызначаны для “схаваных перамяшчэнняў людзей і тэхнікі, іх маскавання ад дронаў і мультыспектральнага выяўлення прыборамі аптычнага назірання”. Аўтар ідэі Кацярына Васільева заявіла, што рыштунак сярод іншага “можна прымяняць на тэрыторыі правядзення СВА (“спецыяльная ваенная аперацыя” — так рэжымы ў Маскве і Мінску называюць расійскую агрэсію супраць Украіны. — “Позірк”.) і ў памежных падраздзяленнях расійскай арміі”. Паведамлялася, што “вырабы ўжо адшытыя, прайшлі паспяховае тэставанне і адпраўленыя добраахвотнікам на фронт”.
У чэрвені 2023 года НаўДУ абвясціў пра распрацоўку сістэмы “разумны дом” для “цэнтра дапамогі і падтрымкі ветэранаў СВА і іх сем’яў “Вяртанне”, а ў траўні — пра навучанне “асоб, якія прэтэндуюць на пасаду сацыяльнага каардынатара дзяржаўнага фонду падтрымкі ўдзельнікаў спецыяльнай ваеннай аперацыі “Абаронцы айчыны”.