За 2024 год Беларусь правяла больш за 700 мерапрыемстваў вайсковай супрацы, каля паловы — з РФ
Група беларускіх вайскоўцаў перад адпраўкай на навучанне ў РФ (студзень 2024)
4 студзеня, Позірк. За 2024 год ва Узброеных сілах Беларусі “праведзена больш за 700 мерапрыемстваў” міжнароднай вайсковай супрацы (МВС), “з іх 43% — з Расіяй”, заявіў начальнік дэпартамента МВС — памочнік міністра абароны Валерый Равенка.
Вайсковы чыноўнік адзначыў на сваёй старонцы ў сацыяльнай сетцы Х, што за год “значна актывізаваліся” стасункі Беларусі з Кітаем, Казахстанам, Узбекістанам, Іранам, В’етнамам, Кубай, краінамі Афрыкі (“за апошнія паўтара года пры МА Беларусі акрэдытаваныя прадстаўнікі 5 [афрыканскіх] дзяржаў”).
Годам раней Равенка паведамляў, што ў 2023-м “па лініі абароны” адбылося 623 мерапрыемствы; Мінск актывізаваў супрацу з “В’етнамам, Індыяй, Іранам, Кітаем, Кубай, а таксама 18 дзяржавамі “далёкай дугі”.
Пры гэтым ён адзначыў, што на 2024 год запланавана “802 мерапрыемствы міжнароднай вайсковай супрацы (больш на 25%, чым у 2023 г.) з больш як 30 дзяржавамі свету”.
Спалучэнне Мінска і Масквы інтэнсіфікавалася ў 2020 годзе — пасля сфальсіфікаваных прэзідэнцкіх выбараў у Беларусі, калі Крэмль падтрымаў Аляксандра Лукашэнку, а таксама ў 2022-м — пасля поўнамаштабнага ўварвання РФ ва Украіну, калі беларускі рэжым надаў агрэсару тэрыторыю для нападу і стаў усяляк спрыяць яго дзеянням.
Летась Мінабароны неаднаразова рапартавала пра праходжанне беларускімі вайскоўцамі навучання на тэрыторыі Расіі.
На пасяджэнні Вышэйшага дзяржсавета Саюзнай дзяржавы 6 снежня 2024 года ў Мінску Аляксандр Лукашэнка і Уладзімір Пуцін падпісалі дамову аб гарантыях бяспекі РФ і Беларусі. Расійскі прэзідэнт у той жа дзень заявіў, што гэты дакумент “вызначае ўзаемныя саюзніцкія абавязацельствы па гарантаванні абароны, абарону суверэнітэту, незалежнасці і канстытуцыйнага ладу” дзвюх краін. Ён у чарговы раз нагадаў, што “гаворка ў тым ліку ідзе і пра расійскую тактычную ядзерную зброю”, як ён сцвярджае, размешчаную “з прапановы” Лукашэнкі на тэрыторыі Беларусі.
На згаданым пасяджэнні Лукашэнка публічна папрасіў разгарнуць у Беларусі расійскі ракетны комплекс “Арэшнік”. Пуцін не выключыў такую магчымасць. “Гэта стане магчымым, думаю, у другой палове наступнага года па меры нарошчвання выпуску такіх комплексаў, серыйнага выпуску гэтых комплексаў у Расіі і па меры паступлення гэтых ракетных сістэм на ўзбраенне расійскіх войск стратэгічнага прызначэння”, — сказаў прэзідэнт Расіі.
На палях саміту Еўразійскага эканамічнага саюза 26 снежня ў Ленінградскай вобласці РФ Лукашэнка заявіў, што Беларусь можа размясціць на сваёй тэрыторыі “пакуль дзясятак” комплексаў “Арэшнік”, а “далей паглядзім”.
Аналітыкі амерыканскага Інстытута вывучэння вайны (ISW) расцанілі заявы Лукашэнкі пра гатоўнасць дапамагчы РФ удасканальваць “Арэшнік” як сведчанне “далейшага збліжэння расійскай і беларускай абаронных прамысловых баз у адпаведнасці з намаганнямі Расіі па паскарэнні паглынання Беларусі ў рамках Саюзнай дзяржавы”.